Annagül GURDOWA, Türkmenistanyň halk artisti, «Türkmengaz» döwlet konserniniň Medeni-işewürlik merkeziniň ýokary derejeli artisti-wokalisti:

— Ömrüm bilen ömürdeş, ýaşym bilen ýaşytdaş, döwrüm bilen döwürdeş bolan aýdymlarymy ýerine ýetirip ýörenime ýetmiş ýyldan gowrak wagt boldy. Meniň döredijiligimde Watan waspy, döwrüň tarypy, durmuşy temalar esasy orun tutup gelýär. Biz bu gün päk asmandaky guşlar ýaly, sungatyň uç-gyraksyz äleminde erkana ganat ýaýyp şirin-şirin aýdymlary aýdýarys, il-günümize lezzet paýlaýarys. Bagty aýdym-sazyň iň köp ýaňlanýan ýerinden gözläň diýlen paýhasly söz bar. Şondan ugur alanyňda hem biziň ýurdumyzyň bagtyň mekanydygyna göz ýetirmek bolýar.

«Türkmenistanyň hemişelik Bitaraplygynyň 30 ýyllygy» atly ýadygärlik kümüş nyşany bilen sylaglanmagym ylhamdan doly kalbymy ganatlandyrdy. Biziň borjumyz türkmen sungatyny has kämilleşdirmek hem-de ony nesillere mynasyp görnüşde geçirmek, olara hakyky sungatyň nämedigini öwretmek bolup durýar. Daşary ýurtlarda türkmen aýdym-sazlarynyň belentden ýaňlanýandygyny, gyzgyn elçarpyşmalara mynasyp bolýandygyny görüp buýsanýarsyň. Şeýle buýsanjyňy artdyrýan pursatlara şaýat bolýandygymyz üçin ykbaldan ýüzde-müň razy. Munuň üçin Gahryman Arkadagymyza, Arkadagly Gahryman Serdarymyza bagşy kalbymdan soňlanmajak alkyşlary aýdýaryn. Çuň manyly şygarlara beslenen ýyllarda bitirilen beýik işler ata Watanymyzy ösüşlere besledi. Goý, «Garaşsyz, baky Bitarap Türkmenistan — bedew batly at-myradyň mekany» atly täze — 2026-njy ýyl hem şeýle şöhratly ýyllaryň biri bolsun! Täze ýyl bilen ähli halkymyzy, Gahryman Arkadagymyzy, Arkadagly Gahryman Serdarymyzy bagşy ýüregimden gyzgyn gutlaýaryn!