Ählumumy metan borçnamasyndan gelip çykýan şertleri ýerine ýetirmek maksady bilen, «Türkmengaz» döwlet konserniniň Ylmy-barlag tebigy gaz institutynyň daş-töweregi goramak bölüminiň gurnamagynda institutyň Maglumat-seljeriş merkezinde parnik gazlarynyň zyňyndylaryna emeli hemra arkaly gözegçilik etmek üçin ösen tehnologiýalara degişli ugurlar boýunça monitoring etmek we olaryň üstünde takyklyga baha bermek, maglumatlary werifikasiýa etmek we başga-da degişli ugurlarda iş alyp barmaklygyň halkara usullaryna degişli wideoaragatnaşyk arkaly onlaýn okuw sapaklary geçirildi. Gurnalan okuw sapagyna «Döwletabatgazçykaryş», «Marygazçykaryş», «Lebapgazçykaryş», «Suwuklandyrylan gazy öndürmek boýunça Lebap önümçilik» müdirlikleriniň we «Türkmengazakdyryş» birleşiginiň hünärmenleri gatnaşdylar.

Emeli hemra arkaly parnik gazlarynyň zyňyndylaryna gözegçilik etmek üçin ösen tehnologiýalary synlamak boýunça wideoaragatnaşyk arkaly onlaýn okuw sapaklarynda Metan howa agentligi, Spektrometriýanyň fizikasy we emeli hemra zondirleme tehnologiýasy, Konsentrasiýa çykarmak algoritmleri we mukdary ölçegiň matematiki usullary, Walidasiýa we barlag üçin halkara standartlary, IMEO MARS ulgamy we amaly integrasiýa boýunça ugurlara seredilip geçildi.

Okuw sapaklarynda metanyň fiziki-himiki profili, Global ýylylyk potensialy (GWP), Metana «çalt ryçag» hökmünde seretmek we antropogen goşant, antropogen zyňyndylaryň gurluşy, esasy pudaklar we syzma mehanizmler, zyňyndylary azaltmak mümkinçiligi, halkara gün tertibi we başlangyçlar hem-de 2030-njy ýyla çenli Ýol kartasy beýan edildi.

Okuw sapaklarynyň ahyrynda bolsa, IMEO MARS ulgamynda esasy global standartlaşdyrma gurluşy, torlary boýunça walidasiýa, gözegçilikli synaglary hem-de ýüze çykýan näbellilik şertlerine seredilip geçildi. Emeli hemralarynyň maglumatlaryny gaýtadan işlemegiň prosesleri we iň soňky tehnologiki ösüşlere çuňňur girişmek hem-de olary gaýtadan işlemek babatynda onuň geçişde anyklanylyşy barada maglumatlar seljerildi. Kadalaşdyrma we düzgünleşdirme boýunça «OGMP 2.0» we «EC» kadalaşdyryjy nawigasiýasyna hem garaldy.

Onlaýn okuw sapagynyň dowamynda gatnaşyjy hünärmenler tarapyndan degişli ylmy-amaly we tehniki ugurlar babatda sorag-jogap alşyldy.