«Merkezi Aziýanyň gaz halkasy» taslamasy türkmen gazynyň eksporty üçin goşmaça sebitleýin ugur döredip biler diýip, Global gaz merkeziniň (GGC, Ženewa) ýerine ýetiriji direktory Waleri Dýukro «Türkmenistanyň nebiti we gazy — 2026» atly 31-nji halkara maslahatynda we sergisinde belledi.

«Merkezi Aziýanyň gaz halkasy» taslamasy türkmen gazyny Özbegistana, Gazagystana, şeýle hem özara birikdirme şertinde Gyrgyzystana we Täjigistana ibermek üçin goşmaça sebitleýin ugur döredip biler. Şunda hereket edýän eksport borçnamalary saklanyp galar diýip, Dýukro aýtdy.

Ol Merkezi Aziýanyň we Azerbaýjanyň döwlet Baştutanlarynyň Konsultatiw duşuşygynda Türkmenistanyň Prezidenti Serdar Berdimuhamedowyň turba geçiriji infrastrukturasy we elektrik energiýasy bilen üpjünçilik babatda hyzmatdaşlyk mümkinçilikleri barada gürrüň edendigini belledi. Dünýä bazarlarynyň durnuksyzlygy şertlerinde uzak möhletleýin energetika gatnaşyklaryny pugtalandyrmaga aýratyn üns berildi.

Dýukro Türkmenistanyň Hytaýa ýylda 30 milliard kub metrden gowrak gaz eksport edýändigini ýatlatdy. Merkezi Aziýa — Hytaý gaz geçirijiler ulgamy ýylda 55 milliard kub metre niýetlenendir. HHR-e meýilleşdirilýän goşmaça şahanyň gurulmagy ýene-de 30 milliard kub metr kuwwaty goşmaga mümkinçilik berer.

Onuň bahalandyrmasyna görä, energiýa serişdelerine bolan islegiň dünýäde iň köp ösýän sebiti günorta we gündogar bölegidir. Pakistanyň ilaty takmynan 240 million adamdan ybarat. Hindistanda 1,4 milliarddan gowrak adam ýaşaýar; ýurt 2030-njy ýyla çenli öz energiýa balansynda tebigy gazyň paýyny 15%-e çenli ýokarlandyrmagy (häzirki wagtda bu görkeziji takmynan 6%) maksat edinýär.

Owganystan, Eýran, Özbegistan we Merkezi Aziýanyň beýleki ýurtlary hem öz ykdysadyýetlerini döwrebaplaşdyryp, energetika we senagat pudaklaryny giňeldýärler. Bilermeniň belleýşi ýaly, olara ygtybarly, uly möçberlerde elýeterli we hojalyklar üçin-de, senagat üçin-de bahasy amatly energiýa zerurdyr.