Türkmenistan tebigy gazy has çuňlaşdyryp gaýtadan işlemek üçin täze kuwwatlyklary gurmak boýunça tasllamalary durmuşa geçirmeklige we maliýeleşdirmeklige Awstriýanyň kompaniýalaryny çekmeklige gyzyklanma bildirýär. Bu barada «Türkmenhimiýa» döwlet konserniniň başlygy Nyýazly Nyýazlyýew Awstriýanyň daşary işler ministri Mihael Linhartyň ýolbaşçylygynda Türkmenistana glen wekiliýet bilen geçiren duşuşygynda belledi.

«Türkmenhimiýanyň» başlygynyň bellemegine görä, uzakmöhletleýin döwlet maksatnamalarynyň çäginde Türkmenistanda «mawy ýangyjy» has çuňlaşdyryp gaýtadan işlemek, azot we fosfor dökünlerini, ýod-brom önümlerini, kaustik sodasyny we hlory öndürmek, Garabogaz aýlagynyň gidromineral serişdelerini toplumlaýyn özleşdirmek boýunça täze kuwwatlyklary gurmakda birnäçe ileri tutulýan taslamalar bar.

N.Nyýazlyýewiň belleýşi ýaly, ägirt uly eksport kuwwatlyklara eýe bolan Türkmenistan Awstriýa «Türkmenhimiýada» öndürilen ýokary hilli himiýa önümlerini ibermäge ukyplydyr. Şol sanda — polietilen we polipropilen, ECO-93 ekologiýa taýdan arassa benzin, granulirlenen karbamid, hlorly kaliý, tehniki ýod we uglerod.

— Öz gezeginde, Türkmenistanyň Prezidenti tarapyndan durmuşa geçirilýän açyk maýa goýum syýasaty daşary ýurtly maýadarlara bähbitli hyzmatdaşlyk gatnaşyklaryny sdürmek üçin giň mümkinçilikleri açýar — diýip Nyýazlyýew belledi.

Onuň şeýle hem belleýşi ýaly, 2010-njy ýyldan bäri Türkmenistanyň himiýa pudagyny ösdürmek üçin 2010-njy ýyldan bäri 8,4 mlrd dollar gönükdirildi. Diňe mineral dökünlerini öndürmek boýunça önümçilik kuwwatlyklarynyň jemi möçberi bu döwürde 3 esseden gowrak artdyryldy.

Soňky on ýylda Türkmenistanda Mary we Garabogaz şäherlerinde döwrebap täze ammiak-karbamid toplumlary, Garlyk kaliý dag magdan toplumy, Gyýanlyda polimer zawody, Ahal welaýatynda tebigy gazdan benzin öndürýän zawod we beýlekiler işe girizildi.