Süýt ähli süýt önümleriniň esasyny düzýär. Süýtden bişirilýän manna, tüwi, greçka, dary şüleleri ösüp gelýän ýaş çagalaryň hemmetaraplaýyn sagdyn bolmagynda uly ähmiýete eýedir. Dünýä inen çaganyň sagdyn ösüp kemala gelmeginde ene süýdi gymmatly iýmit çeşmesi bolup durýar. Onda çaga bedenjiginiň doly kemala gelmegi, kadaly ösmegi, bekemegi üçin zerur maddalar saklanýar.

Süýt içmek islendik ýaşdaky adamlara maslahat berilýär. Meselem, sygyr süýdünde bedene zerur bolan maddalaryň aglabasy bar. Olardan kalsiý, fosfor, organiki duzlar, magniý, B₁, B₂, PP, С, A witaminleri, karotin, laktoflawin, süýt ýagy ýaly gymmatly iýmit çeşmeleri süňkleri, dişleri pugtalandyrmakda, nerw öýjüklerini rahatlandyrmakda, ukyny kadalaşdyrmakda, damarlaryň diwarjyklaryny berkitmekde, deriniň ýagdaýyny gowulandyrmakda örän ähmiýetlidir. Lukmanlar iýmit-siňdiriş ulgamynda näsazlyk bolan, allergenlere ýokary duýgurlykly adamlara süýt önümlerini yzygiderli kabul etmek maslahat berilmeýär. Şeýle ýagdaýda geçi süýdüni içmek bolar, sebäbi onda allergiýa döredýän maddalar ýokdur.

Geçi süýdi kalsiý, fosfor, magniý, ýod, natriý, marganes, mis, ftor, selen ýaly makro-mikroelementleriň, D, K, B₃, B₂, B₉, A witaminleriniň egsilmez çeşmesi bolup durýar. Geçi süýdi ýeňil özleşip, bedeni gurplandyrýar, immunitetiňi pugtalandyrýar, allergiýa döretmeýär. Süýtden her bir saçagyň bezegi bolan gatyk, dorag, aýran, çal, peýnir, gurt ýaly peýdaly önümler taýýarlanylýar.

Kerim JUMAGELDIÝEW,

Türkmen döwlet binagärlik-gurluşyk institutynyň talyby.