Mary welaýatynyň ýaşaýjylary hem «Marygazüpjünçilik» müdirliginiň welaýatyň etraplaryndaky hem-de şäherlerindäki işlerini döwrebap guraýan gaz hojalyk edaralarynyň işgärleriniň tutanýerli zähmeti arkaly «mawy ýangyç» bilen ýylyň bütin dowamynda bökdençsiz üpjün edilýär. Berkarar döwletiň täze eýýamynyň Galkynyşy döwründe özleriniň gündelik durmuşynda tebigy gazyň hözirini görüp ýaşaýan welaýatyň bagtyýar ilatynyň Arkadagly Serdarymyzyň bu sahawatyna hoşallyklarynyň, ýürek alkyşlarynyň çägi ýok.

Welaýatyň iň iri etraplarynyň biri bolan Sakarçäge etrabynyň obalarynyň ýaşaýjylarynyň öý-ojaklaryny tebigy gaz bilen ýylyň dowamynda ýeterlik derejede üpjün etmek «Sakarçägeetrapgaz» gaz hojalyk edarasynyň hünärmenleriniň, işçileriniň her biriniň gündelik baş aladasy bolup durýar. Edaranyň gazçylary häzir otuz üç müň ýedi ýüz segsen ýedi sany hojalyga, etrabyň çägindäki edara-kärhanalaryň bolsa elli altysyna hyzmat edýärler. Olar umumy uzynlygy bir müň üç ýüz elli bäş kilometr alty ýüz iki metr bolan ýokary, orta, pes basyşly gaz geçirijileriň «mawy ýangyjy» geçirişini hemişe gözegçilikde saklaýarlar. Gazçylar etrabyň ilatynyň sanynyň ýyl-ýyldan artýandygyna görä, bellenilen meýilnama esasynda gaz geçirijileriň göwrümini giňeltmek, degişli ýerlerinde abatlaýyş işlerini geçirmek, şeýle hem täze döreýän ilatly ýerlerde, Milli maksatnama laýyklykda, gaz geçirijilerini gurmak işlerini ýerine ýetirýärler.

«Halkyň Arkadagly zamanasy» ýylynyň geçen döwründe olar «Türkmengazüpjünçilik» birleşiginiň Gazlaşdyrmak boýunça gurluşyk-gurnaýyş müdirliginiň Mary welaýatyny gazlaşdyrmak boýunça gurluşyk-gurnaýyş ülşüniň gazçylary bilen bilelikde bu ugurda maksatnamalaýyn işleri ýerine ýetirdiler. Etrabyň Soltanyz geňeşligini «mawy ýangyç» bilen üpjün edýän ýokary basyşly eltiji gaz geçirijiniň degişli ýerlerinde düýpli abatlamak işleri geçirilipdir. Şol geňeşlige barýan ýokary basyşly gaz geçirijiniň iki müň sekiz ýüz metrlik bölegi bolsa ýer üstüne geçirilipdir.

Etrabyň Gorgangala geňeşliginiň ilatynyň artmagy bilen, sarp edijilere «mawy ýangyjyň» ýetmezçiligi ýüze çykmaz ýaly, geňeşlige barýan ýokary basyşly gaz geçirijiniň sekiz ýüz elli metrinde ozalky göwrüminiň diametri 114 millimetr bolan gaz geçirijä derek, diametri 219 millimetr bolan gaz geçiriji çekilýär. Gazçylar etrabyň Aýnaköl, Agzybir geňeşliklerine tebigy gaz berýän orta basyşly eltiji gaz geçirijileriň ugrunda-da olaryň göwrümini giňeldip, durkuny täzeleýiş işlerini ýerine ýetiripdirler.

Etrabyň merkezi Sakarçäge şäherinde maşgalalara mellek ýerleriniň bölünip berilmegi bilen täze ilatly ýerler emele gelipdir. Şol ilatly ýerlerde gazçylar tarapyndan bir müň altmyş üç metr uzynlykda göwrüminiň diametri 76 millimetr bolan orta basyşly gaz geçiriji gurlupdyr we gaz paýlaýjy, gaz sazlaýjy enjamlar hem goýlup, gazlaşdyrmak işleri ýerine ýetirilipdir.

— Häzirki wagtda, Milli maksatnama laýyklykda, etrabymyzyň Çaşgyn geňeşliginiň çäginde täze dörän ilatly ýerleri gazlaşdyrmak işleri ýerine ýetirilýär. Obada uzynlygy bir müň bir ýüz altmyş metr bolan ýokary hem orta basyşly gaz geçirijiniň gurluşyk-gurnaýyş işleri alnyp barylýar. Göwrümleriniň diametrleri 114 hem-de 159 millimetr bolan bu gaz geçirijini şu ýylyň ahyryna çenli gurup ulanmaga bermek göz öňünde tutulýar.

Güýz-gyş möwsümi gazçylar üçin aýratyn jogapkärli döwür hasaplanylýar. Şoňa görä, biz bu möwsüme öňünden göwnejaý taýýarlyk gördük. Bellenilen meýilnama esasynda gaz geçirijilerde, gaz paýlaýjy, gaz sazlaýjy enjamlarda bejeriş, abatlaýyş, sazlaýyş işlerini talabalaýyk geçirdik. Şu işlerde tejribeli hünärmenlerimiz, işçilerimiz öz zähmet göreldelerini görkezdiler. Olardan gaz ölçeýji enjamlary hasaba almak gullugynyň ussasy Baýram Hasanow, daşary gaz geçirijilerine hyzmat etmek gullugynyň slesarlary Gurbangeldi Allakow, Berdimyrat Çaryýew, Guwanç Ýagşyýew, Baýsähet Durdyýew, içeri öý gullugynyň abatlamak we bejermek boýunça slesarlary Maksat Ýazdurdyýew, Mergen Jumalyýew dagy köpýyllyk iş tejribeleri bolan işgärlerimizdir. Olar ilat arasynda yzygiderli bolup, tebigy gazdan tygşytly hem howpsuz peýdalanmak barada düşündiriş işlerini hem geçirýärler — diýip, «Sakarçägeetrapgaz» gaz hojalyk edarasynyň başlygy Arslan Akweliýew gürrüň berýär.