Arkadag Serdarly bagtyýar ýaşlar ýylynda belleniljek mukaddes Garaşsyzlygymyzyň 32 ýyllyk şanly toýunyň öňüsyrasynda ýaş aýdymçylaryň arasynda geçirilen «Ýaňlan, Diýarym! — 2023» telebäsleşigi sungat äleminde birnäçe ýaş zehinleri ýüze çykardy.  

Türkmenistanyň Medeniýet ministrligi hem-de Telewideniýe, radiogepleşikler we kinematografiýa baradaky döwlet komitetiniň bilelikde guramagynda geçirilýän bäsleşik ýaşlara döredijilik zehinini, ukyp-başarnygyny açyp görkezmäge giň mümkinçilik berýär. «Aşgabat» aýdym-saz merkezinde geçirilen «Ýaňlan, Diýarym!» telebäsleşiginiň jemleýji tapgyryna gatnaşyjylar hormatly Prezidentimiziň iberen Gutlagyny uly ruhubelentlik bilen diňlediler.

«Ýaňlan, Diýarym!» telebäsleşiginiň jemleýji tapgyrynda zehinli aýdymçylaryň 12-si bäsleşip, olar nusgawy, halk we döwrebap aýdymlary ussatlyk bilen ýerine ýetirdiler. Bäsleşige gatnaşan ýaş, zehinli aýdymçylar ýüregindäki ylhamy aýdym-sazyň üsti bilen beýan etmegi başardylar. Türkmen aýdym-saz sungatynda özboluşly ýol goýan halypalaryň aýdan aýdymlaryny bu günki günde ýaş zehinlerimiz döwrebap öwüşginde ýerine ýetirýärler. Ýurdumyzda medeniýetimizi we sungatymyzy ösdürmek boýunça giň gerimli işler durmuşa geçirilýär. Ýaşlaryň döredijilik taýdan kämilleşmekleri üçin ähli şertler döredilip, döwrebap medeniýet merkezleri gurulýar.

Aşgabat agşamynyň owadan öwüşginlerinde açyk sahnada ýaş, zehinli aýdymçylaryň köňlünde beslän duýgularyny zybana getirip, mahmal owazy bilen joşup duran pursadyny synlanyňda, halypalaryň ýoluny mynasyp dowam etdirýän ýaş zehinleriň ýetişýändigine buýsanýarsyň. Ine-de, döredijilik bäsleşiginiň tolgundyryjy pursady. Tomaşaçylaryň joşgunly el çarpyşmalary astynda ýeňijileri ň altysy — Aş gabat şäheri ni ň daşary ýurt dillerine ýöriteleşdirilen 132-nji orta mekdebiniň informatika mugallymy Hezretguly Guldurdyýew, Ahal welaýatynyň Ak bugdaý etrabynyň ýöriteleşdirilen 8-nji orta mekdebiniň iňlis dili mugallymy Batyr Şalarow, Balkan welaýat medeniýet müdirliginiň Balkanabat şäher medeniýet merkeziniň usulyýetçisi Bagdagül Mämmetgurbanowa, Daşoguz welaýat medeniýet müdirliginiň «Dostluk çemeni» tans toparynyň artisti Aýgözel Batyrowa, Türkmenistanyň Oba hojalyk ministrliginiň «Lebapgallaönümleri» önümçilik birleşiginiň Saýat galla kabul ediş nokadynyň tüwi sehiniň ussasy Babajan Rozyýew, Mary welaýatynyň Murgap etrabynyň Oguzhan şäherçe medeniýet merkeziniň akkomponiatory Nurýagdy Bekiýew dagy yglan edilip, olar ýörite diplomlar we Türkmenistanyň Prezidentiniň adyndan altyn zynjyr bilen sylaglandylar. Bäsleşigiň jemleýji tapgyryna gatnaşyjylaryň ählisine döwlet Baştutanymyzyň adyndan ýadygärlik sowgatlary gowşuryldy.

Bäsleşige gatnaşyjylar hormatly Prezidentimiziň adyna Ýüzlenme kabul edip, geljekde-de ajaýyp aýdymlary bilen Watanymyzyň waspyny etjekdiklerine ynandyrdylar.