Ýurdumyzda öndürilýän önümleriň mukdaryny artdyrmak we eksport etmek Türkmenistanyň yzygiderli durmuşa geçirýän ykdysady syýasatynyň möhüm ugry bolup durýar. Ýurdumyzyň nebitgaz we himiýa senagatynyň kärhanalary şol wezipäniň çözülmegine mynasyp goşantlaryny goşýarlar.

Munuň şeýledigini "Awaza" milli syýahatçylyk zolagynda geçirilen Merkezi Aziýa döwletleriniň Baştutanlarynyň Konsultatiw duşuşygyna bagyşanyp guralan Merkezi Aziýa ýurtlarynyň milli önümleriniň halkara sergisi aýdyň görkezdi.

Serginiň işiniň dowamynda Türkmenistanyň Döwlet haryt-çig mal biržasy tarapyndan söwdalar geçirilip, olarda umumy bahasy ABŞ-nyň 100 million dollaryndan gowrak bolan nebithimiýa önümlerini satyn almak barada geleşikler baglaşyldy.

Hususan-da, “Türkmengaz” döwlet konseri daşarky bazara suwuklandyrylan gazyň 10 müň tonnasyny satdy, ýangyç suwuklandyrylan gazy saklaýan we ugradýan Naýyp terminalyndan eksporta iberiler. Ony Owganystanyň, Türkiýäniň, Russiýanyň we Gyrgyzystanyň işewür toparlarynyň wekilleri satyn aldylar.

Türkmenbaşydaky nebiti gaýtadan işleýän zawodlar toplumynda öndürilýän nebit önümleri uly islege eýe boldy. Daşary ýurtly işewürler A-92 awtomobil benzininiň 35 müň tonnasyny, gidro usul bilen arassalanylan EKO-5 dizel ýangyjynyň 30 müň tonnasyny, uçar ýangyjynyň 10 müň tonnasyny, nebit koksynyň dürli görnüşleriniň 16 müň tonnasyny, suwuklandyrylan gazyň 10 müň tonnasyny we mazudyň 20 müň tonnasyny satyn aldylar.

Alyjylaryň hatarynda – Owganystanda, Beýik Britaniýada, Germaniýada, Gonkongda, Gyrgyzystanda, Birleşen Arap Emirliklerinde, Russiýada, Türkiýede, Özbegistanda hasaba alynan kompaniýalar bar. Şol gün nebitgaz toplumynyň kärhanalary tarapyndan ýerlenen önümleriň umumy bahasy ABŞ-nyň 70 müň dollaryndan gowrak boldy.