Täze döreýän maşgala üçin özbaşdak öýli bolmak iň bir möhüm meseleleriň biridir. Ýurdumyzda ýaş maşgalalar giňden goldanylýar. Olara döwletimiz tarapyndan dürli ýeňillikler döredilýär. Şeýle oňyn çemeleşme maşgalanyň berk bolmagyna uly ýardam berýär.

— Ata Watanymyz eziz Türkmenistanymyzyň beýik Garaşsyzlygynyň şanly 30 ýyllyk baýramynyň yz ýanynda Türkmenabat şäherimizde uly ýaşaýyş jaý toplumy açyldy. Köp sanly ýaşaýyş jaýlarynyň birinden biziň maşgalamyza hem öý almak miýesser etdi. Bu şatlykly waka biziň baýramçylyk şatlygymyzy goşalandyrdy, göwün guşumyzy ganatlandyrdy — diýip, Atajan Altybaýew gürrüň berýär.

Gürrüňdeşimiz «Türkmengaz» döwlet konserniniň «Suwuklandyrylan gazy öndürmek boýunça Lebap önümçilik» müdirliginde baş hasapçynyň orunbasary bolup zähmet çekýär. Ol 2014-nji ýylda Ýagşygeldi Kakaýew adyndaky Halkara nebit we gaz uniwersitetini üstünlikli tamamlap, inžener-ykdysatçy hünärini ele aldy. Şondan bäri hem bu ýerde göreldeli zähmet çekip gelýär. Atajan geçen ýyllarda müdirlikde dürli wezipelerde yhlasly işledi, tejribe toplady. Özi-de özbaşdak okamagy, öňdebaryjy tejribeleri öwrenmegi dowam etdirýär. Ol 2019-njy ýylda Türkmenistanyň Prezidentiniň ýanyndaky Döwlet gullugy akademiýasynda kommersiýa arbitražy boýunça döwlet gullukçylarynyň hünärini ýokarlandyryş kursuny hem tamamlady. Hünärine kämilligi, başarjaňlygy oňa wezipe borçlaryny kemsiz-köstsüz ýerine ýetirmäge mümkinçilik berýär. Şeýle başarjaň, ýaş hünärmenleriň bir topary suwuklandyrylan gaz öndürmek ýaly ýurdumyz üçin täze ulgamda yhlasly zähmet çekýär. Olaryň agzybirlikli işlemekleri netijesinde esasy bölegi eksporta niýetlenen suwuklandyrylan gazy we Seýdiniň nebiti gaýtadan işleýän zawody üçin gymmatly çig mal bolup durýan gaz kondensatyny öndürmekde ýokary görkezijilere eýe bolunýar.

Müdirlikde işgärleriň ýaşaýyş-durmuş şertlerini gowulandyrmak meselesi ünsden düşürilmeýär. Geçen ýyllarda Türkmenabat we Gazojak şäherlerinde müdirligiň işgärleriniň maşgalalary üçin otaglarynyň ýerleşdirilişi gowulandyrylan kaşaň jaýlaryň birnäçesi gurlup, ulanylmaga berildi.

Ýurdumyzyň ähli ýerlerinde bolşy ýaly, soňky ýyllarda Türkmenabat şäherinde hem ýaşaýyş jaýlarynyň gurluşygy has giň gerime eýe boldy. Bu diýýänlerimize golaýda mele suwly Jeýhunyň kenarynda ýerleşýän şäherde, has takygy, Türkmenabadyň Halkara howa menziline barýan ýoluň ugrunda köp gatly ýaşaýyş jaýlarynyň birbada 17-siniň, şeýle-de kottejleriň 70-siniň gurlup, maşgalalaryň 600-den gowragy üçin gapylaryny giňden açmagy hem aýdyň mysaldyr. Munuň özi hormatly Prezidentimiziň hemişe ezizleýän mähriban halky hakynda edýän deňsiz-taýsyz tagallalaryndan, «Döwlet adam üçindir!» diýen dünýä nusgalyk baş ýörelgesiniň giňden dabaralanýandygyndan habar berýär.

Hawa, şol gün halkymyzyň asylly däplerine eýerilip, ýaşamak üçin ähli amatlyklary bolan öýlerde naz-nygmatly desterhanlar giňden ýazyldy. Olaryň başyna bagtyýarlyk döwrüniň bagtly ynsanlary jem bolup, täze öýli bolanlaryň toý şatlyklaryny paýlaşdylar, olara iň gowy arzuwlaryny beýan etdiler. Atajandyr onuň gelni Laçynyň durmuşyndaky bu ýatda galyjy günde olaryň hossarlarynyň hem begençleriniň çägi bolmady. Her bir işde halkyň, ýurduň bähbidini ileri tutýan Gahryman Prezidentimiziň adyna alkyşly sözler olaryň kalbyndan joşup çykdy.

Mämmetgylyç KÜTIÝEW,

Ussatnews.com.