Paýtagtymyzyň Büzmeýin etrabynyň Büzmeýin ýaşaýyş jaý toplumynda Türkmenistanyň içeri işler edaralarynyň işgärleri üçin gurlan 1 sany 4 gatly, degişlilikde, iki we üç otagly, jemi 32 öýli döwrebap ýaşaýyş jaýynyň açylyş dabarasy boldy, diýip «Türkmenistan: Altyn asyr» saýty habar berýär.

Şeýle-de, Ahal welaýatynyň Ak bugdaý etrabynyň Magtymguly geňeşliginiň «Garaşsyzlyk» ýaşaýyş jaý toplumynda Türkmenistanyň Içeri işler ministrliginiň Ahal welaýat müdirliginiň işgärleri üçin gurlan, 4 gatly 48 öýli döwrebap ýaşaýyş jaýy ulanmaga berildi.

Türkmenistanyň Senagat we gurluşyk önümçiligi ministrliginiň Aşgabat şäherindäki «Demirbetonönümleri» kärhanasynyň gurluşykçylary tarapyndan gurlan dört gatly döwrebap ýaşaýyş jaýynda iki, üç we dört otagly öýler bar.

Mukaddes Garaşsyzlygymyzyň şanly 30 ýyllyk senesiniň giňden dabaralandyrylan ýylynda täze döwrebap jaýlar içeri işler edaralarynyň işgärleri üçin ajaýyp sowgat boldy.

Içeri işler edaralarynyň işgärlerine öýleriň açarlary dabaraly ýagdaýda gowşuryldy. Olar özleri hakynda edilýän taýsyz tagallalar üçin hormatly Prezidentimiziň adyna alkyş sözlerini aýtdylar.