Zenanlaryň baýramy mynasybetli halkara maslahat we sergi

18:29 02.03.2022

https://www.ussatnews.com/storage/posts/3000/original-1621f7126403bb.jpeg

1-nji martda paýtagtymyzda hormatly Prezidentimiz Gurbanguly Berdimuhamedowyň başlangyjy boýunça “Bagtyýarlyk baharynyň şekillendiriş sungatyndaky waspy” atly halkara maslahat we sergi öz işine başlady. Ol Halkara zenanlar gününe bagyşlandy.

Söwda-senagat edarasynda guralan forumda suratkeşleriň, zergärleriň işleriniň, amaly-haşam sungatynyň önümleriniň sergisi ýaýbaňlandyryldy.

Bahar paslynyň esasy bezegi bolan güller şu günki guralan serginiň özboluşly nyşanyna öwrüldi. Suratkeşleriň işlerinde, ajaýyp halylaryň nagyşlarynda, zenanlaryň zehininden dörän keşdelerde we zergärçilik önümlerinde gülleriň şekilleri möhüm orun eýeleýär. Misden, bürünçden taýýarlanan dürli görnüşdäki gaplar, küýzäniň we farfor önümleriniň bezegleri, ösümlik dünýäsine bagyşlanan kompozisiýalar bu ýerde guralan çärä özboluşly öwüşgin çaýdy.

Ýurdumyzyň welaýatlarynyň wekilleri küýze önümlerini, çeper halylary we haly önümlerini görkezdiler. Milli lybaslaryň görnüşleriniň we beýleki serişdeleriň özboluşly bezeg aýratynlyklary sergä gatnaşyjylarda uly gyzyklanma döretdi.

Şu ýylyň «Halkyň Arkadagly zamanasy» şygaryna bagyşlanan işlere sergide aýratyn bölüm berlipdir.

Milli medeniýetiň, baý däp-dessurlaryň ruhunda guralan sergide baýramçylyk ýagdaýy emele geldi. Senetçiler, halyçylar, dutar ussalary, ýaş suratkeşler, heýkeltaraşlar, zergärler öz ussatlyklaryny, ukyp-başarnyklaryny görkezdiler.

Sergide görkezilýän gymmatlyklarda zenanlara söýgi we hormat äşgär duýulýar. Berkarar döwletiň täze eýýamynyň Galkynyşy döwrüniň dörediji zenanlary, milli ruhy-ahlak gymmatlyklaryny goraýjylar bolan zähmetsöýer gelin-gyzlar, olaryň duýgy dünýäsi köp asyrlaryň dowamynda medeniýet işgärlerini täze döredijilik gözleglerine ruhlandyrypdyr.

Ýaşajyk sazandalaryň ýerine ýetiren hoş owazly sazlary sergä gatnaşyjylarda ýakymly täsirleri galdyrdy.

Serginiň açylyş dabarasyna Hökümet agzalary, ministrlikleriň we pudaklaýyn dolandyryş edaralarynyň ýolbaşçylary, ýokary okuw mekdepleriniň rektorlary, jemgyýetçilik guramalarynyň, ýurdumyzda işleýän diplomatik wekilhanalaryň hem-de halkara guramalaryň, köpçülikleýin habar beriş serişdeleriniň wekilleri, medeniýet işgärleri, ýaşlar gatnaşdylar. Onda çykyş edenler hormatly Prezidentimiz Gurbanguly Berdimuhamedowyň yzygiderli tagallasy netijesinde, ýurdumyzyň zenanlarynyň we ösüp gelýän ýaş nesilleriň döwrebap bilim almagy, sazlaşykly ösüşi, şol sanda hünär almagy we bagtyýar durmuşy üçin ähli zerur şertleriň döredilýändigini nygtadylar.

Döwlet Baştutanymyzyň zenanlar, olaryň durmuş derejesini berkitmek, Türkmenistanyň Konstitusiýasyna we umumy ykrar edilen halkara hukuk kadalaryna laýyklykda, gender deňligini üpjün etmek baradaky aladany ýurdumyzyň döwlet syýasatynyň möhüm ugry hökmünde kesgitländigi nygtaldy. Bu ugurda milli kanunçylygy kämilleşdirmek, eneligi we çagalygy goramaga gönükdirilen maksatnamalary üstünlikli ýerine ýetirmek, köp çagaly maşgalalara durmuş goldawyny bermek boýunça alnyp barylýan işler munuň aýdyň beýanydyr.

Mähriban zenanlara bagyşlanan forumyň çäklerinde Döwlet medeniýet merkeziniň Mukamlar köşgüniň Döwlet simfoniki orkestriniň, meşhur estrada aýdymçylarynyň, sungat ussatlarynyň, tans toparlarynyň çykyşlary guraldy.

Günüň ikinji ýarymynda baýramçylyk maksatnamasynyň çäklerinde bu ýerde halkara maslahatyň umumy mejlisi geçirildi. Oňa sanly ulgam arkaly daşary ýurtly wekiller hem gatnaşdylar.

Şekillendiriş sungatynda, häzirki zaman türkmen halylarynda, heýkeltaraşlyk we küýzegärçilik sungatynda zenanlaryň keşbi, milli äheňler, häzirki zaman çeper eserleri döretmegiň ugurlary, şeýle hem suratkeşleri taýýarlamakda sungat mekdepleriniň orny ýaly mowzuklar maslahatyň esasy meselelerine öwrüldi.

Gadymy döwürlerden bäri şahyrlar, ýazyjylar, sazandalar we suratkeşler enä tagzym edipdirler, zenan gözelliginiň, olaryň maşgala gymmatlyklaryna hem-de Watana bolan wepalylygynyň waspyny ýetiripdirler. Häzirki nesiller paýhasly pederlerimiziň wesýetlerine eýerip, zenanlara bolan hormat ýörelgelerini dowam etdirýärler.

Ýurdumyzda ajaýyp bahar baýramy — Halkara zenanlar güni asylly dessurlara laýyklykda geçirilýär we döwletimiziň zenanlara bolan üns-aladasynyň aýdyň nyşany bolup durýar.

Maslahata gatnaşyjylar ýokary bilim we hünär derejesiniň, oňyn başlangyçlary öňe sürmegiň we giň dünýägaraýşyň häzirki döwrüň zenanlarynyň häsiýetli aýratynlyklary bolup durýandygyny bellediler. Olaryň döwlet sylaglaryna mynasyp bolýanlarynyň sany ýyl-ýyldan artýar. Milletiň ruhy-ahlak gymmatlyklaryny gorap saklamakda, sagdyn durmuş ýörelgesini wagyz etmekde, ýurdumyzyň geljegi bolan ýaş nesilleri watansöýüjilik ruhunda terbiýelemekde we olaryň sazlaşykly ösüşini üpjün etmekde zenanlara möhüm orun degişlidir.

Diýarymyzyň gelin-gyzlary döwlet we jemgyýetçilik işlerine işjeň gatnaşýarlar. Olar döwlet häkimiýet we dolandyryş edaralarynda, ykdysadyýetiň ähli pudaklarynda deň derejede zähmet çekýärler, telekeçilik we jemgyýetçilik işlerini alyp barýarlar. Ýurdumyzyň zenanlary hormatly Prezidentimiz Gurbanguly Berdimuhamedowyň başlangyjy boýunça durmuşa geçirilýän özgertmelere mynasyp goşant goşýarlar.

Bu forum şu gün Döwlet çeperçilik akademiýasynda hem-de Şekillendiriş sungaty muzeýinde, Döwlet medeniýet merkeziniň Döwlet muzeýinde şekillendiriş sungaty, onuň milli mirasymyzda eýeleýän orny we muzeý gymmatlyklary mowzuklary boýunça geçirildi.

Sergi 8-nji marta çenli dowam eder.

Başga habarlar
1660642fe573ec.jpeg
Türkmenistanyň Prezidenti Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň döredilen güni mynasybetli geçirilýän maslahata gatnaşyjylary gutlady

Türkmenistanyň Prezidenti Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň döredilen güni mynasybetli geçirilýän maslahata gatnaşyjylary gutlady.


16605c9e3c714a.jpeg
Türkmenistanyň Halk Maslahatynyň Başlygy Koreýa Respublikasynyň işewür toparlarynyň wekilleri bilen hyzmatdaşlyk meselelerini maslahatlaşdy

27-nji martda Türkmenistanyň Halk Maslahatynyň Başlygy Gurbanguly Berdimuhamedowyň Koreýa Respublikasynyň işewür toparlarynyň wekilleri bilen geçiren duşuşygynda ýangyç-energetika toplumynda we beýleki ugurlarda hyzmatdaşlyk meselelerini maslahatlaşdy diýip, TDH habar berýär.


16605c764b211f.jpeg
Serdar Berdimuhamedow TDG-niň Baş sekretary bilen türki döwletleriň arasynda hyzmatdaşlygy ösdürmek meselesini maslahatlaşdy

Türki döwletler bilen netijeli gatnaşyklary mundan beýläk-de ösdürmek Türkmenistanyň daşary syýasat strategiýasynda möhüm orun eýeleýär. Bu barada Prezident Serdar Berdimuhamedowyň 27-nji martda Türki Döwletleriň Guramasynyň Baş sekretary Kubanyçbek Omuraliýew bilen geçiren duşuşygynda belledi.

16605c5c3c2959.jpeg
Türkmenistanyň Prezidenti YHG-nyň Baş sekretary bilen hyzmatdaşlygy ösdürmegiň mümkinçiliklerini maslahatlaşdy

27-nji martda Prezident Serdar Berdimuhamedowyň Ykdysady Hyzmatdaşlyk Guramasynyň Baş sekretary Husraw Noziri bilen geçiren duşuşygynda köpugurly hyzmatdaşlygy ösdürmegiň mümkinçilikleri ara alnyp maslahatlaşyldy diýip, TDH habar berýär.


166046e26b225d.jpeg
Çalik Enerji türk kompaniýasy Türkmenistanda elektrik stansiýasynyň gurluşygy üçin maliýe kepilligini aldy

Türkiýäniň Çalik Enerji energetika kompaniýasy Türkmenistanda Balkan welaýatynyň Türkmenbaşy şäherinde kuwwaty 1,574 MWt bolan birleşdirilen aýlaw elektrik stansiýasynyň gurluşygy üçin Germaniýanyň “Commerzbank” bankyndan we Şweýsariýanyň Eksport Karz Agentliginden (ECA) 586 million ABŞ dollary möçberinde maliýe kepilligini aldy. Bu barada Halkara habarlar merkezi habar berýär.