Öň öwrenişen ýeralmamyzy gymmatly önümleriň hatarynda göz öňüne getirmek kyn bolsa gerek. Şeýle-de bolsa, köki miwelileriň gymmat bahaly ajaýyp görnüşleri bar. Iň gymmatly “La Bonotte” ýeralmasynyň bir kilogramynyň bahasy 600 dollardan gowrakdyr. Oňa başgaça altyn ýeralma hem diýýärler.

Ýeralmanyň bu sorty dünýäde ýeke täk ýerde – Fransiýanyň çäginde ýerleşýän Nuarmutýe adasynda öndürilýär. “La Bonetteniň” beýle gymmat bolmagynyň sebäbine ähli adam düşünmeýär. Fransuz naharhanalaryny bilýänler bu ajaýyp ýeralma sortunyň bir wagtyň özünde süýjüligi bilen duzlulygy utgaşyp, iň näzik gurluşunyň, ýakymly tagamynyň bardygyny aýdýarlar. Olar deňziň golaýynda ösdürilip ýetişdirilýänligi sebäpli, kökleri duzlary özüne siňdirip alýarlar. Olar üçin tebigy dökün hökmünde suwotular ulanylýar.

Mundan başga-da, onuň gymmatlylygy hasylyň el bilen ýygnalmagy we mukdarynyň çäkliligi bilen düşündirilýär. Bir möwsümde bary-ýogy 100 tonna önüm ýygnalýar. “La Bonette” ýeralmasyny başga ýerde ösdürip ýetişdirmek hiç kime başartmady. Görnüşi ýaly, adanyň ýerleşişi we topragyň aýratyn düzümi bu meselede möhüm orun eýeleýär.

Bahar GAZAKOWA,

Türkmen oba hojalyk institutynyň mugallymy.