Türkmenistanyň Prezidentiniň Permany Gylyjow Ç.B. hakynda

Gylyjow Çary Baýramowiçi, işde goýberen kemçilikleri üçin, Türkmenistanyň Ministrler Kabinetiniň Başlygynyň orunbasary wezipesinden boşatmaly.

Türkmenistanyň Prezidenti

Serdar Berdimuhamedow

Aşgabat şäheri, 2022-nji ýylyň 4-nji iýuny.

4-nji iýunda hormatly Prezidentimiz Serdar Berdimuhamedow Ministrler Kabinetiniň we Döwlet howpsuzlyk geňeşiniň bilelikdäki giňişleýin mejlisiniň barşynda Ministrler Kabinetiniň Başlygynyň orunbasary Ç.Gylyjowe ýüzlenip, soňky döwürde gözegçilik edýän düzümleriniň işine gözegçiligi gowşadandygyny, ilatyň sarp edýän harytlarynyň, aýratyn hem, oba hojalyk pudagynyň önümleriniň öndürilişini artdyrmak boýunça işleriň haýal alnyp barylýandygyny nygtady. Söwda ulgamynyň, sanly ulgamy ornaşdyrmak nazara alnanda, häzirki zaman üpjünçilik ulgamlaryny emele getirmek boýunça işler hem ýaramaz ýola goýlupdyr. Şonuň netijesinde, söwda ulgamynda köp sanly düzgün bozmalara ýol berilýär.

Döwlet Baştutanymyz daşary ýurtlardan getirilýän önümleriň ornuny tutýan harytlary öndürmek boýunça işleriň hem ýaramaz alnyp barylýandygyna ünsi çekip, bu ugurda entek uly mümkinçilikleriň bardygyny, bu mümkinçilikleriň ýeterlik ulanylmaýandygyny aýtdy.