Ýagşygeldi Kakaýew adyndaky Halkara nebit we gaz uniwersitetiniň talyplary döwletimiziň nebitgaz pudagynyň edara-kärhanalarynda önümçilik tejribeliklerini geçdiler. Önümçilik tejribelikleriniň ýangyç-energetika ulgamynyň ýokary tehnologiýalar bilen enjamlaşdyrylan döwrebap kärhanalarynda geçirilmegi olaryň nazaryýetde öwrenenlerini önümçilikde pugta özleşdirmeklerine ýardam berýär.

Bu ýokary okuw mekdebiniň nebit we gaz fakultetiniň «Nebit we gaz guýularyny burawlamak» kafedrasynyň 3-nji ýyl talyplary dört hepdäniň dowamynda «Türkmengaz» döwlet konserniniň «Marygazçykaryş», «Döwletabatgazçykaryş» müdirlikleriniň guýulary ýerasty we düýpli abatlaýyş sehlerinde, «Türkmengeologiýa» döwlet korporasiýasynyň Mary welaýatynyň çägindäki burawlaýyş kärhanalarynda önümçilik tejribeliklerini geçdiler.

Kärhanalaryň önümçiligi bilen ýakyndan tanyş bolmak, köpýyllyk iş tejribeleri bolan halypa hünärmenleriň geçirýän önümçilik-tejribe okuwlaryna gatnaşmak talyp ýaşlara saýlap alan hünärini pugta ele almakda diýseň netijeli hem ähmiýetli boldy. Önümçilik tejribeligi wagtynda «Türkmengaz» döwlet konserniniň «Türkmengazburawlaýyş» müdirliginiň burawlaýjylarynyň «Galkynyş» gaz käniniň çägindäki gözleg hem ulanyş guýularyny burawlamakdaky alyp barýan işleri talyp ýaşlarda aýratyn gyzyklanma döretdi. Olar bu ýerde Hytaý Halk Respublikasynyň önüm öndürijileriniň döwrebap, kämil buraw enjamlary arkaly guýulary burawlamakda ulanylýan tehnologiýalar, işdäki täze usullar bilen içgin tanyş boldular. Şonuň bilen birlikde talyp ýaşlar buraw işlerine hem gatnaşdylar.

Müdirligiň hünärmenleri gaz gorunyň möçberi boýunça dünýäde öňdäki orunlaryň birini eýeleýän «Galkynyş» gaz käniniň ulanyş hem-de gözleg guýularynyň häsiýetli aýratynlyklaryny talyp ýaşlara önümçilik arkaly giňişleýin düşündirdiler.

— «Türkmengaz» döwlet konserniniň hem-de «Türkmengeologiýa» döwlet korporasiýasynyň tejribeli hünärmenleriniň ýolbaşçylygynda geçirilen önümçilik-tejribe okuwlary, olaryň beren gymmatly maslahatlary önümçilik tejribeliginiň netijeli häsiýete eýe bolmagyna ýardam berdi. Talyp ýaşlar önümçilik tejribeliginiň dowamynda bellenilen okuw meýilnamasyna laýyklykda, buraw işlerine gatnaşyp, burawlaýyşda ulanylýan geologiýa maglumatlaryndan özbaşdak peýdalanmagy öwrendiler, burawlamak gulluklaryny dolandyrmaklygy özbaşdak kesgitlemegi özleşdirdiler. Olar guýulary burawlamakdaky geologiýa şertleri bilen hem içgin tanyş boldular. Talyplarymyz guýulary burawlamakda ulanylýan erginleriň taýýarlanylyş usullaryny, düzgünlerini hem pugta öwrendiler.

Bir söz bilen aýdylanda, geçirilen önümçilik tejribeligi talyp ýaşlarymyzyň nazaryýetde öwrenenlerini önümçilikde özleşdirmeklerine şert döretdi — diýip, uniwersitetiň nebit we gaz fakultetiniň «Nebit we gaz guýularyny burawlamak» kafedrasynyň mugallymy Ýakupgeldi Amaniýazow gürrüň berýär.