— Hormatly Prezidentimiz halkyň bähbidini hemme zatdan ileri tutýar, ilatyň abadan durmuşda ýaşamagyna gönükdirilen çäreleri üstünlikli durmuşa geçirýär. Şonuň netijesinde düýpli özgerişler bolup geçýär. Bu diýýänlerime biziň etrabymyzyň mysalynda hem doly göz ýetirmek bolýar. Garaşsyzlyk ýyllarynda diňe ilatly ýerleri gazlaşdyrmak bilen baglanyşykly ýerine ýetirilen işler-de haýran galdyryjydyr. Şolaryň netijesinde iri etrabymyzyň ilatyna «mawy ýangyç» elýeterli boldy. Şeýle wajyp işe biziň işgärlerimiz hem ruhubelentlik bilen gatnaşýarlar — diýip, «Kerkietrapgaz» gaz hojalyk edarasynyň başlygy Marat Hojaýew gürrüň berýär.

Söhbetdeşimiziň aýdýanlaryny Garaşsyzlyk ýyllaryndan ozal etrabyň ilatynda tebigy gazdan peýdalanmak mümkinçiliginiň bolmandygy hem aýdyň tassyklaýar. Häzirki wagtda etrapda gaz geçirijileriň umumy uzynlygy 842 kilometrden hem aşýar. Şeýle-de etrapda gaz paýlaýjylaryňdyr gaz sazlaýjylaryň umumy sany 480-e golaýlaýar. Bu kuwwatlyklaryň hasabyna etrabyň ilatly ýerleri, senagat kärhanalary we medeni-durmuş maksatly binalary tebigy gaz bilen bökdençsiz üpjün edilýär.

Şeýle oňyn ýagdaýy gazanmak üçin bolsa gaz üpjünçilik ulgamynyň saz işlemegini gündelik gözegçilikde saklamak, şeýle-de geljege gönükdirilen işleri maksatlaýyn alyp barmak talap edilýär. Bu diýýänlerimize etrabyň çäginde umumy uzynlygy 25 kilometre barabar bolan ýokary basyşly gaz geçirijiniň durkuny täzelemek bilen baglanyşykly alnyp barylýan işler aýdyň mysallaryň biridir. Şu döwre çenli bu möhüm iş 9,5 kilometre golaý aralykda ýerine ýetirildi. Şonda öňki turbalar geçirijiligi has ýokary bolan turbalar bilen çalşyryldy. Bu işleri galan çäkde hem doly berjaý etmek maksat edinilýär. Şeýle tagallalar hususy hojalyklaryň tebigy gaz bilen üpjünçiligini has gowulandyrmaga ýardam berýär.

Edaranyň ýolbaşçysy golaýda etrabyň Çekir geňeşliginde ýene bir gaz sazlaýjy enjamyň oturdylandygyny hem habar berdi. Bu çäre ilatyň «mawy ýangyç» bilen kadaly üpjün edilmegini gazanmaga gönükdirilendir. Sebäbi obalarda ilatyň sany ýyl-ýyldan artýar, täze ýaşaýyş jaýlary gurulýar. Şeýle guwandyryjy ýagdaýa etrabyň Astanababa şäherçesiniň mysalynda magat göz ýetirip bolýar. Bu ýerde täze gurlan ýaşaýyş jaýlaryna tebigy gaz eltmek maksady bilen ýakyn wagtlarda uzynlygy 3700 metre barabar bolan gaz geçirijisiniň gurluşyk işine girişiler. Şeýle tagallalar ýakyn döwür içinde bagtyýar maşgalalaryň ýene-de onlarçasynyň ojaklarynda tebigy gazyň alawlap başlajakdygyndan habar berýär.

Gürrüňi edilýän gaz hojalyk edarasynda dürli hünärli işgärleriň 90-dan gowragy agzybirlik bilen zähmet çekýär. Hünär ussatlygynyň ýokarydygy olaryň wezipe borçlarynyň belentliginde bolmaklaryny şertlendirýär. Ak ýürekden, yhlasly zähmet çekip, kärdeşlerine görelde görkezýänleriň hatarynda daşary gaz geçiriji gullugyň slesary Allamyrat Döwranow, öý içeri enjamlary gullugynyň slesary Arkadiý Meredow, awariýa-dispetçer gullugynyň sargytlary kabul edijisi Döwlet Hezzetow, gazy hasaba almak we ýerleşdirmek gullugynyň barlagçysy Şazada Haitowa hem-de beýlekiler bar. Olar ilat bilen ýakyn aragatnaşykda bolup, gaz enjamlarynyň talabalaýyk ulanylmagyna, ýangyçdan howpsuz peýdalanylmagyna netijeli gözegçilik edýärler. Şeýle-de hojalyklaryň ählisinde gaz ölçeýji enjamlar oturdylyp, olaryň takyk işledilmeginiň gazanylýandygyny-da ýokarda beýan edenlerimiziň üstüne goşasymyz gelýär. Şonuň hasabyna-da bahasyz baýlygymyzyň tygşytly sarp edilmegi gazanylýar.

Gyş paslynda işimiziň gerimi has giňelýär. Howanyň sowuk aýlarynda etrabymyzyň ilatynyň jaýlarynyň ýyly bolmagyny gazanmak üçin şu döwre çenli zerur çäreleriň uly toplumyny durmuşa geçirdik. Şeýle işleri geljekde hem üstünlikli dowam etdirip, jogapkärli pasly taýýarlykly garşylarys — diýip, Marat Hojaýew ynam bilen aýdýar.

Mämmet GYLYJOW,

Ussatnews.com.