Hormatly Prezidentimiz döwletimiziň milli ykdysadyýetiniň ähli ugurlarynda, şol sanda nebitgaz ulgamynda-da önümçilige innowasion tehnologiýalaryň ornaşdyrylyp, onuň döwrebaplaşdyrylýan döwründe täze tehnologiýalardan, sanly ulgamdan kämil derejede baş çykarýan işçi-hünärmenleri taýýarlamaklygy möhüm wezipeleriň biri hökmünde öňde goýýar. Berkarar döwletiň täze eýýamynyň Galkynyşy döwründe «Türkmengaz» döwlet konserniniň Mary nebitgaz orta hünär okuw mekdebiniň hünäri kämilleşdiriş bölüminde indi birnäçe ýyldan bäri döwletimiziň nebitgaz pudagynyň edara-kärhanalarynda zähmet çekýän işçi-hünärmenleriň hünärini kämilleşdirmek boýunça maksatnamalaýyn işler alnyp barylýar.

Bu bölümde ýylyň dowamynda ýörite düzülen okuw meýilnamasyna laýyklykda kämilleşdiriş okuwlary geçirilip, onda işçi-hünärmenlere nebitgaz pudagyna ornaşdyrylan iň täze tehnologiýalar, enjamlar, innowasiýalar barada giňişleýin düşünje berilýär. Okuw otaglary gerekli görkezme esbaplary, interaktiw tagtalar, nebitgaz önümçiligine degişli döwrebap tehniki serişdeler bilen ýeterlik derejede üpjün edilipdir.

Hünäri kämilleşdiriş bölüminde baý iş tejribesi bolan mugallymlar zähmet çekýärler. Halypa mugallymlaryň okuw otaglarynda geçýän sapaklaryny işçi-hünärmenler çuňňur özleşdirýärler. Ozal nebitgaz pudagynyň edara-kärhanalarynda ençeme ýylyň dowamynda zähmet çeken, häzir şu mekdepde işleýän mugallymlar Amandurdy Agaýewiň, Orazgeldi Işangulyýewiň, Jumageldi Hydyrowyň, Pejepmyrat Annaýewiň baý önümçilik tejribesi bar.

«Türkmengeologiýa» döwlet korporasiýasynyň ýurdumyzyň sebitlerinde ýerleşýän nebitgaz gözleg ekspedisiýalarynyň işçi-hünärmenleri okuw mekdebiniň otaglarynda ýerleşdirilen häzirki zamanyň ýokary tehnologiýaly buraw enjamlarynyň hereket edýän maketleriniň üsti bilen desgalaryň işleýiş düzgünleri, guýulara oturtma turbalarynyň goýberilişi, sement ergini bilen berkidilişi, guýularda ýüze çykýan gaz çüwdürimlerine garşy ulanylýan täzeçe, döwrebap usullar dogrusynda-da giň düşünje alýarlar.

«Türkmengaz» döwlet konserniniň «Marygazçykaryş» müdirliginiň «Galkynyş» gaz känindäki tebigy gazy kükürtden arassalaýan baş desgalaryň okuw otagynda ýerleşdirilen hereket edýän maketler arkaly gaz känindäki guýulardan «mawy ýangyjyň» çykarylyşy, soňra baş desga toplanylyşy, şu ýerde tebigy gazyň düzümindäki kükürtden doly arassalanylyp, harytlyk görnüşine ýetirilişiniň täze tehnologiýasy, soňra harytlyk gazyň ýokary basyşly geçirijiler arkaly sarp edijilere ugradylyşy beýan edilýär. Işçi-hünärmenler şu geçilýän nazary sapaklar arkaly gaz gorunyň möçberi boýunça dünýäde öňdäki orunlaryň birini eýeleýän «Galkynyş» gaz käniniň baş desgalarynda ornaşdyrylýan dünýä ülňülerine laýyk täze tehnologiýalar bilen ýakyndan tanyş bolýarlar.

— «Halkyň Arkadagly zamanasy» diýlip atlandyrylan 2022-nji ýylyň başyndan bäri biziň bölümimizde «Türkmengaz» döwlet konserniniň «Türkmengazüpjünçilik», «Türkmengazakdyryş» birleşikleriniň edara-kärhanalarynyň, «Türkmengeologiýa» döwlet korporasiýasynyň ýerlerdäki nebitgaz gözleg ekspedisiýalarynyň işçi-hünärmenleriniň ýedi ýüzden köprägi hünäri kämilleşdiriş okuwlaryny geçdiler. Olara hünäri kämilleşdiriş okuwyny geçendigi baradaky şahadatnama gowşuryldy — diýip, Mary nebitgaz orta hünär okuw mekdebiniň hünäri kämilleşdiriş bölüminiň uly önümçilik ussasy Kakajan Kakageldiýew gürrüň berýär.

Sapardurdy ÝAÝLYÝEW,

Ussatnews.com.