«Galkynyşda» ýene-de bir guýy önümçilige girizildi
Ýurdumyzda giňden toýlanan goşa baýramçylygyň — Halkara Bitaraplyk gününiň hem-de Nebitgaz senagaty we geologiýa işgärleriniň gününiň öň ýanynda gaz gorunyň möçberi boýunça dünýäde öňdäki orunlaryň birini eýeleýän «Galkynyş» gaz känindäki 60-njy ulanyş guýusy agyz ýakasynyň gurluşyk-gurnama işleri üstünlikli ýerine ýetirilip, önümçilige girizildi.
Gahryman Arkadagymyz geçen ýylyň awgust aýynda Mary welaýatyna iş saparynyň dowamynda «Galkynyş» gaz käninde bolup, bu ýerdäki aýratyn çylşyrymly häsiýeti bilen tapawutlanýan täze ulanyş guýularynyň üçüsiniň gurluşygyna ak pata berdi. Guýulary burawlamak «Türkmengaz» döwlet konserni bilen Hytaý Halk Respublikasynyň nebitgaz korporasiýasynyň CNPC kompaniýasynyň arasynda baglaşylan şertnama esasynda hytaýly hünärmenlere ynanyldy.
Dostlukly döwletiň gazçy hünärmenleri tarapyndan burawlamak işleri üstünlikli geçirilen 60-njy ulanyş guýusyndan ýaňy-ýakynda 4580 metr çuňlukdan tebigy gazyň senagat akymy alyndy.
«Marygazçykaryş» müdirliginiň buýurmasy esasynda ulanyş guýusynyň agyz ýakasynyň gurluşyk-gurnama işlerini «Türkmengaz» döwlet konserniniň «Türkmenýöritenebitgazgurnama» trestiniň 3-nji ýöriteleşdirilen gurnama edarasynyň gurluşykçylary baş potratçy hökmünde ýerine ýetirdiler. Bu ýerde gurluşyk-gurnama işleriniň bellenilen tehnologik talaplara laýyk, öz wagtynda ýerine ýetirilmegi üçin, ilkinji nobatda, edaranyň tejribeli hünärmenleriniň, ýokary hünär derejeli işgärleriniň jemlenilendigini aýtmak gerek. Edaranyň uly iş alyp baryjysy Meýlis Hommadow, gurnaýjy Maksat Gurbanow, ýokary derejeli kebşirleýji Begenç Kakyşew we beýlekiler gurluşykda has tapawutlanyp zähmet çekdiler.
Bu iri möçberli işe dünýäniň ösen döwletlerinde öndürilen, ýöriteleşdirilen kuwwatly gaz gurluşyk mehanizmleriniň ýeterlik möçberiniň çekilmegi, gurluşygyň gerekli tehnologik enjamlar bilen öz wagtynda doly üpjün edilmegi, şeýle hem gurluşyga kömekçi potratçy edaralaryň gatnaşmagy gurluşyk-gurnama işleriniň bellenilen möhletinde berjaý edilmegine ýardam berdi.
Ulanyş guýusynyň agyz ýakasynda ýokary tehnologiýaly, kuwwatly, döwrebap elektrik we gidrawliki enjamlar oturdylypdyr, optiki-süýümli kabeller, aragatnaşyk, wideogözegçilik serişdeleri ornaşdyrylypdyr.
Gurluşyga kömekçi potratçy bolup gatnaşan «Türkmengaz» döwlet konserniniň «Türkmengazawtomatika», «Türkmengazaragatnaşyk» müdirlikleriniň edaralarynyň, «Türkmengündogarnebitgazgurluşyk» trestiniň 5-nji ýörite gurluşyk-gurnama müdirliginiň 6-njy elektrogurnama meýdançasynyň hünärmenleri bu ýerdäki enjamlary, serişdeleri gurnamak hem-de goýberiş-sazlaýyş işlerini ýokary hilli ýerine ýetiripdirler.
Ulanyş guýusynyň agyz ýakasynyň gurluşyk-gurnama, goýberiş-sazlaýyş işleriniň bellenilen tehnologik talaplara doly laýyk ýerine ýetirilmegine «Marygazçykaryş» müdirliginiň Gaz känlerinde desgalary gurdurmak boýunça merkezi inženerçilik we tehnologik gözegçilik gullugynyň degişli hünärmenleri tarapyndan gündelik gözegçiligiň amala aşyrylandygyny aýtmak gerek.
Hormatly Prezidentimiziň tabşyryklary esasynda Berkarar döwletiň täze eýýamynyň Galkynyşy döwründe milli ykdysadyýetimiziň esasy pudaklarynyň biri bolan nebitgaz ulgamyna-da sanly ulgam pugta ornaşdyrylýar. Bu ulanyş guýusynyň agyz ýakasynda ornaşdyrylan optiki-süýümli kabeller, aragatnaşyk, wideogözegçilik enjamlary «Marygazçykaryş» müdirliginiň «Galkynyş» gaz känindäki tebigy gazy kükürtden arassalaýan 1-nji zawodynyň hem-de gazy ilkinji arassalaýan desgasynyň operatorlaryna guýudan çig gazyň çykarylyşyny hem-de şu ýerdäki ýokary basyşly gaz geçiriji arkaly tebigy gazyň akdyrylmagyny sanly ulgam arkaly dolandyrmaklyga mümkinçilik berer.
— Ulanyş guýularynyň agyz ýakasynyň gurluşyk-gurnama işlerini ýokary hilli ýerine ýetirip, ulanyşa bermekde edaramyzyň hünärmenleri, işçileri indi baý iş tejribesini topladylar. Biz «Halkyň Arkadagly zamanasy» ýylynda ozal «Galkynyş» meýdançasyndaky 309-njy ulanyş guýusyny hem önümçilige girizdik. Häzir bolsa şol meýdançadaky 294-nji hem-de 30-njy ulanyş guýularynyň agyz ýakalarynyň gurluşyk-gurnaýyş işlerini alyp barýarys — diýip, 3-nji ýöriteleşdirilen gurluşyk-gurnama edarasynyň başlygy Atajan Sopyýew gürrüň berýär.
Sapardurdy ÝAÝLYÝEW,
Ussatnews.com.
Mary welaýatyndaky känden senagat ähmiýetli gaz akymy alyndy
Berkarar döwletiň täze eýýamynyň Galkynyşy döwrüniň «Garaşsyz, baky Bitarap Türkmenistan — bedew batly at-myradyň mekany» diýen şygar astynda geçýän ýylynda türkmen halkynyň Milli Lideri Gahryman Arkadagymyz tarapyndan başy başlanan, häzirki döwürde bolsa hormatly Prezidentimiz Arkadagly Gahryman Serdarymyzyň baştutanlygynda üstünlikli durmuşa geçirilýän döwlet syýasatynyň netijesinde, Garaşsyz, baky Bitarap Türkmenistanyň ähli ugurlarynda, şol sanda ýangyç-energetika toplumynda taryhy özgertmeler amala aşyrylýar.
Türkmenistanyň nebitgaz toplumy Garaşsyzlygymyzyň 35 ýyllygyny zähmet ýeňişleri bilen garşy alýar
Mukaddes Garaşsyzlygymyzyň şanly 35 ýyllygyna hem-de «Garaşsyz, baky Bitarap Türkmenistan — bedew batly at-myradyň mekany» diýen şygar astynda geçýän ýylyň hormatyna Türkmenistanyň Döwlet medeniýet merkeziniň Mukamlar köşgünde ýokary guramaçylyk derejesinde geçirilen dabaraly mejlis medeniýet we sungat işgärlerini, jemgyýetçiligiň wekillerini bir ýere jemläp, ýurdumyzda täze ruhubelentlik we döredijilik badalgalaryny döretdi.
Türkmenistanyň energetika kuwwaty täze derejä çykýar
Türkmenistanyň ýangyç-energetika toplumy milli ykdysadyýetiň düzüminde möhüm orny eýeläp, ykdysady ösüşi üpjün etmek bilen çäklenmän, eýsem, döwletimiziň halkara giňişliginde eýeleýän ornuny pugtalandyrmagyň möhüm guraly bolup durýar. Häzirki döwürde pudagyň ösüşi uzak möhletli durnuklylygy, tehnologik döwrebaplygy we daşary ykdysady gatnaşyklaryň giňeldilmegini ugur edinýän yzygiderli we strategik häsiýete eýe bolýar.
Türkmenistan we Malaýziýa nebitgaz pudagynda strategik hyzmatdaşlygy berkidýärler
19-njy iýunda paýtagtymyzdaky Söwda-senagat edarasynda geçirilen «Türkmenistan — Malaýziýa: nebitgaz pudagynda özara bähbitli hyzmatdaşlyga 30 ýyl» atly halkara ylmy-amaly maslahat hem-de energetika pudagynda iki ýurduň netijeli gatnaşyklarynyň otuz ýyllygyna bagyşlanan sergi türkmen-malaý gatnaşyklarynyň ýokary derejesini hem-de nebitgaz pudagynda hyzmatdaşlygyň strategik häsiýetini dabaralandyrdy.
Owganystanda TOPH gaz geçirijisiniň strategik böleginiň gurluşygy dowam edýär
«Garaşsyz, baky Bitarap Türkmenistan — bedew batly at-myradyň mekany» diýen şygar astynda geçýän ýylda häzirki döwrüň iri halkara energetika taslamalarynyň biri — Türkmenistan — Owganystan — Pakistan —Hindistan (TOPH) gaz geçirijiniň gurluşygy dowam edýär.
