Ümzükleri ileri, maksatlary aýdyň
«Daşoguzgazüpjünçilik» müdirliginiň baýry kärhanalarynyň biri bolan «Boldumsazetrapgaz» gaz hojalyk edarasynyň işçi-hünärmenleri etrabyň ilatyny we edara-kärhanalaryny gymmatly «mawy ýangyç» bilen üpjün etmekde ýokary netijelere eýe bolýarlar. Dürli derejeli işçi-hünärmenleriň bir ýüz otuza golaýynyň agzybirlik bilen işleýän zähmet köpçüliginde her bir işde halypa gazçylaryň göreldesine eýerilýändigini, ýaş hünärmenleriň öz hünär ussatlyklaryny artdyrmaklarynda baý iş tejribesine eýe bolan işgärleriň möhüm ornunyň bardygyny edaranyň ýolbaşçylary buýsanç bilen gürrüň berýärler.
«Ata kesbi — ogla halal» diýlen parasatly ýörelgä eýerip, halypa gazçylaryň biri bolan Sapar Babaýewiň zähmet ýoluny mynasyp dowam etdirýän tejribeli gazçy Bekdurdy Babaýewiň baştutanlyk edýän bu edarasynda näsazlygy habar beriş, içeri öý gaz enjamlaryny bejeriş hem-de daşary gaz geçirijilere we gaz sazlaýjylara gözegçilik gulluklaryna Myrat Otuzbaýew, Muhammetmyrat Kakaýew, Guwanç Saryýew ýaly tejribeli hünärmenleriň ýolbaşçylyk etmegi munuň aýdyň güwäsidir. Olaryň birleşen tagallalary netijesinde etrapda dürli ululykdaky gaz geçirijileriniň müň kilometrden gowrak ýerine, gaz sazlaýjy we paýlaýjy enjamlarynyň bolsa üç ýüz kyrka golaýyna ýokary derejede gözegçilik edilip, Boldumsaz şäherinde we oba ýerlerinde ýaşaýan on üç müňden gowrak hojalygyň ilatynyň ýylyň islendik möwsüminde «mawy ýangyjyň» eşretli hözirini görmäge giň mümkinçilikler döredilýär.
— Edaramyzyň baý iş tejribeli agzybir zähmet köpçüligi bar. Bu ýerde daşary gaz geçirijilere we gaz sazlaýjy enjamlara gözegçilik edýän gullugymyzyň gazçylary hojalyklara hem-de edara-kärhanalara barýan gaz ulgamlarynyň saz işlemegine gözegçilik edýän bolsalar, içeri öý gaz enjamlaryny bejeriş gullugynyň işgärleri ilat arasynda bolup, ýaşaýyş jaýlaryndaky gaz enjamlaryny gözden geçirip, zerur bolan halatynda abatlap durýarlar. Eger «mawy ýangyjy» ulanyjylaryň gaz enjamlarynda näsazlyk ýüze çykaýan ýagdaýynda bolsa edaramyzyň näsazlygy habar beriş gullugynyň işçi-hünärmenleri ony gyssagly düzetmek bilen, il alkyşyna mynasyp bolýarlar — diýip, «Boldumsazetrapgaz» gaz hojalyk edarasynyň başlygy В.Babaýew hoşallyk bilen aýdýar.
Geçen ýylda edaranyň gazçylary tarapyndan etrabyň Guwanç Atamedow adyndaky geňeşliginiň Birleşik obasynda öň bar bolan göwrüminiň ölçegi 76 millimetrlik gaz geçirijisiniň bir müň iki ýüz metr ýeriniň durkunyň 114 millimetrlik ululykdaky gaz geçirijisi bilen täzelenmegi, şeýle hem täze ilatly ýerleri gazlaşdyrmakda 10 ýyl abadanlyk geňeşliginiň abadanlyk we Täze zaman obalarynda emele gelen täze maşgalalara uzynlygy iki müň metre golaý bolan gaz eltiji ulgamlaryň çekilmegi netijesinde şol ýerde ýaşaýan ilatyň tebigy gaza bolan isleglerini doly kanagatlandyrmaga giň mümkinçilikler döredilipdir. Bu ugurda alnyp barlan işlerde edaranyň daşary gaz geçirijilerine we gaz sazlaýjy enjamlaryna gözegçilik gullugynyň bejeriji slesarlary Mämmet Kerimow, Allanazar Haýydow, Guwanç Orazmedow, Hemra Amanow, elektrik bilen kebşirleýji Orunbaý Saparbaýew we gaz bilen kebşirleýji Ýusup Paltaýew dagynyň öwgä mynasyp işleri alyp barandyklaryny gaz hojalyk edarasynyň baş inženeri Ş.Kulbaýew gürrüň berýär.
Dädebaý NARTYÝEW,
Ussatnews.com.
Türkmenistan energohowpsuzlygyň esasy kepillendirijisi derejesini berkidýär
21-23-nji oktýabrda Aşgabat “Türkmenistanyň nebiti we gazy – OGT 2026” atly 31-nji Halkara maslahatyny we sergini kabul etmek bilen, dünýäniň energetika dialogynyň merkezine öwrüler. Otuz ýyldan gowrak wagtyň dowamynda bu forum daşary ýurtly hyzmatdaşlar bilen hyzmatdaşlygy ösdürmek üçin baş meýdançanyň derejesini üýtgewsiz tassyklap gelýär.
Halk Maslahatynda Türkmenistanyň ýangyç-energetika toplumyny ösdürmegiň ugurlary kesgitlenildi
23-nji sentýabrda paýtagtymyzdaky Maslahat köşgünde türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowyň başlyklyk etmeginde geçirilen Türkmenistanyň Halk Maslahatynyň mejlisi giň gerimli özgertmeleriň netijelerini jemledi hem-de ýurdumyzy durmuş-ykdysady we senagat taýdan ösdürmegiň möhüm wezipelerini kesgitledi.
Gahryman Arkadagymyz TOPH gaz geçirijisiniň owgan böleginiň gurluşygyny çaltlandyrmagyň esasyny kesgitledi
Türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowyň 10-njy awgustda Owganystana amala aşyran taryhy iş sapary ikitaraplaýyn gatnaşyklary ösdürmekde möhüm waka boldy.
Mary welaýatyndaky känden senagat ähmiýetli gaz akymy alyndy
Berkarar döwletiň täze eýýamynyň Galkynyşy döwrüniň «Garaşsyz, baky Bitarap Türkmenistan — bedew batly at-myradyň mekany» diýen şygar astynda geçýän ýylynda türkmen halkynyň Milli Lideri Gahryman Arkadagymyz tarapyndan başy başlanan, häzirki döwürde bolsa hormatly Prezidentimiz Arkadagly Gahryman Serdarymyzyň baştutanlygynda üstünlikli durmuşa geçirilýän döwlet syýasatynyň netijesinde, Garaşsyz, baky Bitarap Türkmenistanyň ähli ugurlarynda, şol sanda ýangyç-energetika toplumynda taryhy özgertmeler amala aşyrylýar.
Türkmenistanyň nebitgaz toplumy Garaşsyzlygymyzyň 35 ýyllygyny zähmet ýeňişleri bilen garşy alýar
Mukaddes Garaşsyzlygymyzyň şanly 35 ýyllygyna hem-de «Garaşsyz, baky Bitarap Türkmenistan — bedew batly at-myradyň mekany» diýen şygar astynda geçýän ýylyň hormatyna Türkmenistanyň Döwlet medeniýet merkeziniň Mukamlar köşgünde ýokary guramaçylyk derejesinde geçirilen dabaraly mejlis medeniýet we sungat işgärlerini, jemgyýetçiligiň wekillerini bir ýere jemläp, ýurdumyzda täze ruhubelentlik we döredijilik badalgalaryny döretdi.
