«Türkmennebit» DK-nyň «Nebitgazçykaryş» trestiniň işgärleri nebit çykarylyşynyň möçberlerini artdyrmak, guýularda düýpli abatlaýyş işlerini geçirmek we olary ulanyşa girizmek boýunça netijeli işleri durmuşa geçirýärler. Nebit guýularyny ulanmakda olaryň netijeliliginiň pese düşmegi gutulgysyz ýagdaý bolandygy üçin nebit çykarylyşyny netijeli guramak bu iş bilen meşgullanýan kärhanalaryň öňünde duran möhüm wezipedir.

Şeýlelikde, 2020-nji ýylda öndürijilikli bolmadyk guýularyň dikeldilip ulanyşa girizilmegi netijesinde trestiň burawçylary «gara altynyň» çykarylyşyny 300 müň tonna möçberinde üpjün etdiler.

Şu ýylyň iki aýynda trestiň burawçylary tarapyndan meýilleşdirilen 78 guýa derek 84 sany guýy ulanyşa girizildi. Netijede, bellenilen döwürde nebit çykarylyşynyň möçberiniň alnan ösüş derejesi meýilleşdirilen 7 müň 67 tonna derek 9 müň 709 tonna barabar boldy.

«Türkmennebit» DK-nyň zähmet düzümleriniň hünärmenleri tarapyndan amala aşyrylýan işlerde dünýäniň öňdebaryjy öndürijileriniň häzirki zaman enjamlary we buraw desgalary ulanylýar. Şeýlelikde, konserniň ygtyýarynda «Bentek» (GFR), «ZJ-70 DS» (HHR), «Uralmaş» (RF) we beýlekileriň öndüren desgalary bar.

Öňdebaryjy tehnologiýalary we desgalary oturtmak hem-de ulanmak netijesinde guýulary düýpli abatlamak boýunça hünärmenler işiň hil taýdan täze derejesine çykdylar. Şu ýylyň iki aýynda 102 sany guýy abatlanyldy, şolardan 84-si ulanyşa girizildi.

Bu döwürde «Gumdagnebit» nebitgazçykaryş müdirliginiň hünärmenleri tarapyndan çykarylýan nebitiň möçberi meýilleşdirilen 322 tonna derek 1 müň 47,5 tonna, «Gamyşlyjanebit» nebitgazçykaryş müdirligi tarapyndan bolsa meýilleşdirilen 352-ä derek 1 müň 358,5 tonna deň boldy.