«Nebit-gaz» gazetiniň redaksiýasynda neşiriň ilkinji sanynyň çykan gününden bäri 15 ýyllygy mynasybetli dabaraly çäre geçirildi. Baýramçylyga Türkmenistanyň Nebitgaz toplumynyň işgärleriniň kärdeşler arkalaşygy Geňeşiniň, «Türkmengaz» we «Türkmennebit» döwlet konsernleriniň wekilleri, şeýle hem redaksiýanyň işgärleri gatnaşdylar.

Türkmenistanyň Prezidentiniň Karary bilen döredilen «Nebit-gaz» gazetiniň ilkinji sany 2011-nji ýylyň 6-njy sentýabrynda çap edildi. Geçen ýyllaryň içinde «Türkmengaz» döwlet konserniniň pudaklaýyn neşiri ýurdumyzyň ýangyç-energetika toplumynyň hakyky ýazgysyna öwrüldi. Onuň sahypalarynda iri halkara infrastruktura taslamalarynyň durmuşa geçirilişi, Türkmenistan — Owganystan — Pakistan — Hindistan (TOPH) gaz geçirijisiniň gurluşygy, iri gaz we nebit ýataklarynyň özleşdirilişi, nebit-himiýa zawodlarynyň döwrebaplaşdyrylyşy we Gahryman Arkadagymyz tarapyndan başlangyjy bu günki günde Türkmenistanyň Prezidenti Serdar Berdimuhamedowyň ýolbaşçylygynda üstünlikli amala aşyrylýan beýleki giň gerimli işleri yzygiderli beýan edilýär.

«Nebit-gaz» gazetiniň baş redaktorynyň, tejribeli žurnalist-halypalaryň, «Türkmengaz», «Türkmennebit» döwlet konsernleriniň hem-de Türkmenistanyň Nebitgaz toplumynyň işgärleriniň kärdeşler arkalaşygynyň Geňeşiniň wekilleriniň çykyşlarynda Gahryman Arkadagymyzyň tagallalary saýasynda döredilen gazetiniň geçen ýoly bellenilip geçildi. Neşiriň sanly infrastrukturasyny bilen ösdürýändigi nygtaldy. Sanly çözgütlere geçilmegi we «Nebit-gaz» gazetiniň elektron görnüşiniň döredilmegi neşiri täze derejä çykardy we ýurdumyzyň içinde, şeýle hem onuň daşynda okyjylar köpçüligini ep-esli giňeltdi.

Dabaranyň çäklerinde gazetiň döredilen pursadyndan bäri redaksiýada zähmet çeken žurnalistika weteranlarynyň, ýerlerdäki kärhanalaryň gazanan üstünliklerini öz wagtynda beýan edýän welaýatlardaky öz-habarçylarynyň, şeýle hem nebitgaz toplumynyň desgasyndan taýýarlanan fotoreportažlaryň we önümçiligiň öňdebaryjylary baradaky materiallaryň awtorlarynyň goşantlary aýratyn bellenildi. Çykyş edenler neşiri ösdürmek, onuň maddy-tehniki üpjünçiligini kämilleşdirmek we işgärler üçin amatly şertleri döretmek meselelerine aýratyn üns berdiler.

Özleriniň yhlasly döredijilik zähmeti bilen neşiriň taryhynda we okyjylaryň kalbynda öçmejek iz galdyran gazetiň ozalky habarçylary Swetlana Goržiy, Hojaberdi Baýramow we Mämmetgylyç Kutiýew barada iň mähirli ýatlamalar aýdyldy.

Çäräniň soňunda Türkmenistanyň Nebitgaz senagaty işgärleriniň kärdeşler arkalaşygynyň Geňeşiniň we «Türkmengaz», «Türkmennebit» döwlet konsernleriniň adyndan «Nebit-gaz» gazetiniň işgärlerine gymmat bahaly we ýadygärlik sowgatlar gowşuryldy.