Ýakymly ysy we tagamy bilen tapawutlanýan alma witaminlere we minerallara baý bolan ýokumly miweleriň biri hasaplanylýar. Almanyň düzüminde organiki turşulyklar, şeker, glýukoza, fruktoza, efir ýaglary, A, K, C, E, B6 witamini, kletçatka, pektin maddalary, mineral duzlar (demir, marganes, kaliý, natriý, kalsiý), fitonsidler we beýleki maddalar saklanýar.

Almanyň saglyga peýdasy barada geçirilen barlaglaryň netijesinde onuň ýürek-damar kesellerine we bedenimiziň goranmak ukybynyň güýçlenmegine täsiriniň uludygy anyklanyldy. Beýni we nerw ulgamynyň näsazlygy bilen ýüze çykýan huşsuzlyk, gürlemek kynçylygy, hereketiň agyrlaşmagy ýaly ýagdaýlaryň öňüni almakda hem alma peýdalydyr. Alma iýmit siňdiriş ulgamyny kadalaşdyrýar. Gandaky şekeriň mukdarynyň deňagramly bolmagy, süňklerimiziň berkligi üçin günde bir alma iýmek maslahat berilýär. Ýatmazdan öň alma iýmegiň rahat uklamak üçin ähmiýeti uludyr. Hytaý lukmançylygynyň taryhynda alma beden gyzgynlygyny düşüriji hökmünde giňden ulanylýar.

Bu miwäniň düzümindäki käbir himiki birleşmeleriň täsiri bilen içegeleriň işjeňligini artdyrýandygy we iýmit siňdiriş ulgamyndaky zyýanly bakteriýalaryň ýok edilýändigi mälim edildi.

Taýýarlan Batyr KERIMOW,

Türkmen döwlet binagärlik - gurluşyk institutynyň talyby.