Ýokary hilli, geçginli önümler
Garaşsyzlyk ýyllarynda Seýdiniň nebiti gaýtadan işleýän zawodynda düýpli özgerişlikler bolup geçdi. Önümçiligiň durkunyň düýpli täzelenilmegi, täze önümçilik desgalarynyň gurlup, ulanylmaga berilmegi işleriň netijeliligini has ýokarlandyrmak bilen birlikde, içerki we daşarky bazarlarda ösen islegden peýdalanýan önümleri köp möçberlerde öndürmäge-de amatly şertleri döretdi. Munuň şeýledigine 2015-nji ýylda işe girizilen ýol bitumyny öndürýän desganyň mysalynda hem aýdyň göz ýetirmek bolýar. Kämil desganyň ulanylmaga berilmegi çig mallary has çuňňur gaýtadan işlemäge, şonuň netijesinde ýene bir geçginli önümi içerki we daşarky bazarlara çykarmaga mümkinçilik berdi.
Mälim bolşy ýaly, hormatly Prezidentimiziň tagallalary arkaly ýurdumyzda ýol gurluşygynyň gerimi ýyl-ýyldan giňelýär. Şeýle amatly ýagdaý bu önüme bolan islegiň düýpli artmagyny şertlendirdi. Gowy hilli we gerekli önümleriň hyrydarlarynyň hataryna daşary ýurtly işewürler hem barha işjeň goşulýarlar. Indi birnäçe ýyldan bäri gündogar welaýatyň bu iri senagat kärhanasyndan ýol bitumy goňşy Özbegistan döwletine yzygiderli ugradylýar. Şeýle peýdaly hyzmatdaşlyk üstümizdäki ýylda hem üstünlikli dowam etdirilýär. «Halkyň Arkadagly zamanasy» ýylynyň geçen döwründe dostana ýurda bu önümiň 1300 tonnasy ugradyldy. Baglaşylan şertnama laýyklykda, ýylyň aýagyna çenli bu görkeziji 3000 tonna ýetiriler.
Kämil desganyň agzybir we başarjaň hünärmenleri önümçiligiň sazlaşykly we öndürijilikli hereket etmegini üpjün edýärler. Olaryň birleşen tagallalary arkaly ýylyň başyndan bäri ýol bitumynyň 14,3 müň tonnadan gowragy öndürilip, sarp edijilere ugradyldy. Şol bir wagtyň özünde kärhanada öndürilýän beýleki nebit önümleriniň hem hyrydarlarynyň ýetikdigini bellemek artykmaçlyk etmez.
— Hormatly Prezidentimiz ýurdumyzyň ykdysadyýetiniň pudaklaryna ylmyň we tehnikanyň soňky gazananlaryny ornaşdyrmaga çynlakaý üns berýär. Oňa biziň desgamyz hem mysal bolup biler. Bizde el zähmeti doly aradan aýrylyp, ähli işler awtomatlaryň üsti bilen dolandyrylyp, olara kämil kompýuterler arkaly gözegçilik edilýär. Desgamyzda dürli hünärli işgärleriň ýigrimi altysy egin-egne berip, yhlasly zähmet çekýär. Işleriň sazlaşykly guralmagy, işgärler üçin amatly iş we durmuş şertleriniň döredilmegi gazanýan önümçilik görkezijilerimiziň ýokary bolmagyna uly ýardam berýär — diýip, desganyň baş mehanigi Hoşgeldi Hakberdiýew gürrüň berýär.
Söhbetdeşimiz desgada ýokary hünär ussatlygyny ele alyp, kärdeşleriniň arasynda tapawutlanýan işgärleriň az däldigini aýratyn nygtady we olary birin-birin agzady. Halal zähmet çekip, abraý-hormata eýe bolýanlaryň arasynda uly operator Jumadurdy Abdullaýew, operatorlar Jelaleddin Amanmetow, Begenç Joraýew, tehnologik sorujylaryň maşinisti Ýusup Ýollyýew we beýlekiler bar. Bu gaýratly we ruhubelent adamlar ýurdumyzda gazanylýan bedew batly ösüşlerde özleriniň mynasyp goşantlarynyň bardygyna buýsanýarlar we has-da ýokary öndürijilikli zähmet çekmek hyjuwy bilen joşýarlar. Möhüm işdäki şeýle ruhubelentlik ýagdaýy olaryň şanly ýylda hem belent sepgitlere ýetjekdiklerine bolan ynamy berkidýär.
Mämmetgylyç KÜTIÝEW,
Ussatnews.com.
Mary welaýatyndaky känden senagat ähmiýetli gaz akymy alyndy
Berkarar döwletiň täze eýýamynyň Galkynyşy döwrüniň «Garaşsyz, baky Bitarap Türkmenistan — bedew batly at-myradyň mekany» diýen şygar astynda geçýän ýylynda türkmen halkynyň Milli Lideri Gahryman Arkadagymyz tarapyndan başy başlanan, häzirki döwürde bolsa hormatly Prezidentimiz Arkadagly Gahryman Serdarymyzyň baştutanlygynda üstünlikli durmuşa geçirilýän döwlet syýasatynyň netijesinde, Garaşsyz, baky Bitarap Türkmenistanyň ähli ugurlarynda, şol sanda ýangyç-energetika toplumynda taryhy özgertmeler amala aşyrylýar.
Türkmenistanyň nebitgaz toplumy Garaşsyzlygymyzyň 35 ýyllygyny zähmet ýeňişleri bilen garşy alýar
Mukaddes Garaşsyzlygymyzyň şanly 35 ýyllygyna hem-de «Garaşsyz, baky Bitarap Türkmenistan — bedew batly at-myradyň mekany» diýen şygar astynda geçýän ýylyň hormatyna Türkmenistanyň Döwlet medeniýet merkeziniň Mukamlar köşgünde ýokary guramaçylyk derejesinde geçirilen dabaraly mejlis medeniýet we sungat işgärlerini, jemgyýetçiligiň wekillerini bir ýere jemläp, ýurdumyzda täze ruhubelentlik we döredijilik badalgalaryny döretdi.
Türkmenistanyň energetika kuwwaty täze derejä çykýar
Türkmenistanyň ýangyç-energetika toplumy milli ykdysadyýetiň düzüminde möhüm orny eýeläp, ykdysady ösüşi üpjün etmek bilen çäklenmän, eýsem, döwletimiziň halkara giňişliginde eýeleýän ornuny pugtalandyrmagyň möhüm guraly bolup durýar. Häzirki döwürde pudagyň ösüşi uzak möhletli durnuklylygy, tehnologik döwrebaplygy we daşary ykdysady gatnaşyklaryň giňeldilmegini ugur edinýän yzygiderli we strategik häsiýete eýe bolýar.
Türkmenistan we Malaýziýa nebitgaz pudagynda strategik hyzmatdaşlygy berkidýärler
19-njy iýunda paýtagtymyzdaky Söwda-senagat edarasynda geçirilen «Türkmenistan — Malaýziýa: nebitgaz pudagynda özara bähbitli hyzmatdaşlyga 30 ýyl» atly halkara ylmy-amaly maslahat hem-de energetika pudagynda iki ýurduň netijeli gatnaşyklarynyň otuz ýyllygyna bagyşlanan sergi türkmen-malaý gatnaşyklarynyň ýokary derejesini hem-de nebitgaz pudagynda hyzmatdaşlygyň strategik häsiýetini dabaralandyrdy.
Owganystanda TOPH gaz geçirijisiniň strategik böleginiň gurluşygy dowam edýär
«Garaşsyz, baky Bitarap Türkmenistan — bedew batly at-myradyň mekany» diýen şygar astynda geçýän ýylda häzirki döwrüň iri halkara energetika taslamalarynyň biri — Türkmenistan — Owganystan — Pakistan —Hindistan (TOPH) gaz geçirijiniň gurluşygy dowam edýär.
