Tomsuň yssy wagtyna garamazdan, çagalar dynç almagyň, şatlygyň we umyt-arzuwlaryň, täze duşuşyklaryň, täze açyşlaryň döwrüni başdan geçirýärler. Uly adamlaryň esasy aladasy çagalaryň dynç alyş möwsümini sagdyn we ýatdan çykmajak wakalara baý bolan pursatlara öwürmekden ybaratdyr.

Ýurdumyzyň ýangyç-energetika toplumynyň düzümleri bu asylly işe mynasyp goşantlaryny goşýarlar. “Türkmennebit” Döwlet konserniniň kärdeşler arkalaşygynyň başlygy Akmyrat Amanow ussatnews.com gazetiniň okyjylaryna bu ugurda geçirilýän işler barada şeýle gürrüň berdi:

- Türkmenistan çagalar sagaldyş merkezleriniň ulgamyny döretmegiň giň gerimli maksatnamasyny amala aşyrýar. Häzir ýangyç-energetika toplumynyň edarasyna degişli çagalar sagaldyş merkezleriniň birnäçesi bolup, olar paýtagtymyzyň etegindäki ajaýyp Gökdere jülgesinde, şeýle hem gojaman Hazaryň kenarynda ýerleşýär. “Türkmennebit” Döwlet konserniniň garamagynda “Gara altyn” atly çagalar sagaldyş merkezi bolup, ol Balkan welaýatynyň Hazar şäherinde ýerleşýär hem-de dynç alyş döwründe çagalaryň wagtyny peýdaly geçirmegi üçin ähli şertler döredildi.

Şu ýyl tomus dynç alyş möwsümleriniň 4-niň dowamynda bu ýerde pudagyň işgärleriniň çagalary – oglanlaryň we gyzlaryň 800-si dynç alar. Her möwsüm çagalaryň “Gara altyna” gyzykly syýahatlaryndan başlanýar.

Türkmenistanyň Bilim ministrligi tarapyndan işlenip taýýarlanylan Çäreleriň meýilnamasyna laýyklykda çagalar sagaldyş merkezinde dürli döredijilik bäsleşikleri we duşuşyklary geçirilýär. Olar çagalara öz zehinlerini açyp görkezmäge, milli we dünýä medeniýetiniň genji-hazynasy bilen ýakyndan tanyşmaga, şeýle hem gyzykly syýahatlara, sport ýaryşlaryna gatnaşmaga, döredijilik toparlarynyň çykyşlaryna tomaşa etmäge mümkinçilik döredýär. Çagalar dynç alyş merkezleriniň işine ussat mugallymlar we terbiýeçiler, lukmanlar we aşpezler çekilýär.

Ýurdumyzyň beýleki çagalar sagaldyş merkezlerinde bolşy ýaly, “Gara altynda” hem ýaş nesliň oňaýly dynç almagy, saglygyny berkitmegi we sazlaşykly ösmegi üçin ajaýyp şertler döredildi. Çagalaryň ygtyýarynda kitaphana, mejlisler zaly, kompýuter otagy, tomsuna we gyşyna sport bilen meşgullanmak üçin zallar, tans we oýun oýnalýan meýdançalar, el işleri we aýdym-saz otaglary, tennis kortlary, dynç alyş otaglary we naharhana bar.

Çagalar dynç alyş merkezi türkmen topragynyň ekologiýa taýdan arassa künjeginde – tebigy gözelligi we ajaýyp howa aýratynlyklary bilen tapawutlanýan Hazar deňziniň kenarynda ýerleşýär.

Kenaryň tebigaty ýaşlara saglygyny berkitmäge we keýpini götermäge ýardam edýär, dürli gezelençler bolsa, özleri üçin ülkäniň baý ösümlik we haýwanat dünýäsini açmaga, tebigata aýawly garamagy öwrenmäge mümkinçilik döredýär, bu bolsa, çagalaryň dynç alşyny ýatdan çykmajak, peýdaly we öwreniş häsiýetli çärelere öwürýär.

“Gara altyn” sagaldyş merkeziniň tapawutly aýratynlygy çagalar üçin nebit we gaz ýataklaryna gezelençleriň guralmagy bolup durýar. Olar pudagyň düzümleýin desgalary, deňizdäki nebit we gaz ýataklaryny özleşdirmek, ene-atalarynyň hünärleri bilen ýakyndan tanyşýarlar.

Akmyrat Amanowyň baý mazmunly gürrüňini dowam etmek bilen, çagalaryň ýagdaýynyň köp babatda milletiň ynsan mümkinçiliklerini kesgitleýändigini bellemek isleýärin. Jemgyýetde dowam edýän giň gerimli durmuş-ykdysady özgertmeler şertlerinde, dünýäniň globallaşmagy bilen baglylykda Türkmenistanyň geljegi köp babatda çagalaryň üpjünçiligine maddy, ruhy-medeni, bilim-terbiýe, lukmançylyk, ekologiýa, maksat-syýasy nukdaýnazardan bolan garaýyş bilen kesgitlenýär. Çagalary terbiýelemek, olara bilim bermek, beden we ruhy taýdan kemala getirmek, olary bazar gatnaşyklary şertlerindäki durmuşa taýýarlamak – Türkmenistanyň döwlet ösüşiniň hem-de onuň global dünýäde mynasyp ornuny üpjün etmegiň esasy şertleri bolup durýar.

Çagalaryň güler ýüzleri we şadyýan sesleri – täze taryhy eýýämyň ýokary gymmatlyklarynyň dabaralanmagynyň, ýurdumyzyň abadançylygynyň, ata Watanymyzyň şu gününe we geljegine bolan ynamyň ajaýyp subutnamasydyr.

Leýli Aşyrowa,

ussatnews.com.