Türkmenistan Gruziýa uçar ýangyjyny uly möçberde iberýän döwlet bolup durýar. Geçen 11 aýyň içinde bu ýurda reaktiw ýangyjyň 40 müň tonnadan gowragy ugradyldy, bu görkeziji gruzin tarapynyň satyn alan uçar kerosininiň umumy mukdarynyň 80 göterime golaýyny düzdi. Bu barada Gruziýanyň Nebit önümleriniň alyjylar birleşmesi habar berýär.

Türkmenistanyň eýýäm birnäçe ýyl bäri Gruziýa uçar ýangyjyny iberýän esasy döwletleriň sanawynyň başyny çekip, Türkiýäniň, Rumyniýanyň we beýleki döwletleriň nebithimiýaçylary bilen üstünlikli bäsleşýändigini bellemek gerek.

Türkmenbaşydaky nebiti gaýtadan işleýän zawodlar toplumynda öndürilýän beýleki nebit önümleri hem uly islegden peýdalanýar. Hususan-da, ýanwar-noýabr aýlarynda biziň ýurdumyzdan Gruziýanyň bazaryna awtomobil benzininiň we dizel ýangyjynyň 93 müň tonnadan gowragy baryp gowuşdy.