Şeýle at bilen «Burnebitgazhyzmat» müdirliginiň Tehniki wagyz ediş we durmuş maksatly hyzmatlar merkezinde «Türkmennebit» döwlet konserniniň Kärdeşler arkalaşygynyň komitetiniň we Zenanlar guramasynyň bilelikde guramagynda geçirilen dabaraly maslahat juda işjeň häsiýete we ýokary ruhubelentlige eýe boldy.

Şu ýylyň 21-nji ýanwarynda Aşgabatda Hazar deňzindäki «Dostluk» ýatagynyň uglewodorod serişdelerini bilelikde gözlemek, işläp taýýarlamak we özleşdirmek hakynda Türkmenistanyň Hökümeti bilen Azerbaýjan Respublikasynyň Hökümetiniň arasynda özara düşünişmek hakyndaky Ähtnama gol çekilmegine bagyşlanan bu dabaraly maslahatda konserniň önümçilik düzümlerinde dürli kärde zähmet çekýän nebitçilerdir gazçylar çykyş etdiler. Olardan «Türkmennebit» döwlet konserniniň Zenanlar guramasynyň başlygy Ogulbibi Şyhyýewa, «Türkmennebit» döwlet konserniniň Kärdeşler arkalaşygynyň komitetiniň başlygy Akmyrat Amanow, «Nebitgazburawlaýyş» trestiniň Nebitdag buraw işleri müdirliginiň KA-nyň ilkinji guramasynyň başlygy Kadyrberdi Baýryýew, «Nebitgazçykaryş» trestiniň Awtoulag we ýöriteleşdirilen tehnikalar müdirliginiň KA-nyň ilkinji guramasynyň başlygy Tuwakgylyç Geldiýew, «Nebitgazburawlaýyş» trestiniň Nebit we gaz guýularyny berkitmek boýunça müdirliginiň KA-nyň ilkinji guramasynyň başlygy Azat Niýazmeňliýew we beýlekiler öz çykyşlarynda Gahryman Arkadagymyzyň milli ykdysadyýetimiziň nebitgaz pudagyny dünýä nusgalyk derejede ösdürmekde edýän taýsyz tagallalarynyň, çäksiz hemaýat-goldawlarynyň bu gün öz oňyn netijelerini bolluk bilen eçilýändigini buýsanç bilen aýtdylar.

Dabaraly maslahatda aýratyn nygtalyşy ýaly, hormatly Prezidentimiziň yzygiderli ýöredýän «Açyk gapylar» syýasaty bütin dünýäde giň goldawa eýe bolup, döwletleriň arasynda ikitaraplaýyn we köptaraplaýyn ykdysady gatnaşyklary netijeli ýola goýmaklyga uly mümkinçilikleri açýar. Gürrüňi edilýän Ähtnama gol çekilmegi hem türkmen we azerbaýjan nebitçileriniň nebitgaz pudagyndaky başarnyklaryny bütin aýdyňlygy bilen açyp görkezer. Bu taryhy waka «Türkmenistan — parahatçylygyň we ynanyşmagyň Watany» ýylynyň hem ruhuna doly laýyk gelýär.

Maslahata gatnaşyjylar Gahryman Arkadagymyza döwletimiziň berkararlygyny pugtalandyrmakda, halkymyzyň bagtyýarlygyny has-da arşa götermekde alyp barýan beýik işlerinde baky rowaçlyk arzuw etdiler.