Aýsoltan KOWUSOWANYŇ durmuş we döredijilik ýoly
Ýurdumyzyň teatrlarynda milli eserlerimiz bilen bir hatarda, doganlyk halklaryň eserleri hem sahnalaşdyrylýar. Magtymguly adyndaky Milli sazly drama teatrynda özbek dramaturgy Nurullo Abbashanyň Türkmenistanyň halk artisti Nury Hudaýgulyýew tarapyndan sahnalaşdyrylan «Körpe gelin» atly komediýany tomaşaçylar tarapyndan şowhunly garşy alyndy. Onda körpe gelniň gaýynenesiniň keşbini Türkmenistanyň at gazanan artisti Aýsoltan KOWUSOWA ussatlarça janlandyrmagy başardy.
Aýsoltan Kowusowa bilen durmuş we döredijilik ýoly barada guran söhbetdeşligimizi USSAT NEWS elektron gazetiniň okyjylaryna ýetirmegi makul bildim.
— Aýsoltan, ykbalyňyzy teatr sahnasy bilen baglanyşdyrmagyňyza itergi beren zat näme?
— «Adam arzuwsyz bolmaz, guş — ganatsyz» diýlişi ýaly, çagalykdan artist bolmagy arzuw edýärdim. Teleýaýlymyň üsti bilen halypa artistleriň çykyş edýän sahna oýunlaryna yzygiderli tomaşa edýärdim. Arzuwym meni paýtagtymyzdaky öňki Medeni aň-bilim tehnikumyna alyp geldi. Tehnikumyň aktýorlary taýýarlaýan bölüminde okap, ony üstünlikli tamamladym. Şeýdibem 2001-nji ýylda Magtymguly adyndaky Milli sazly drama teatrynda işe başladym. Bu gün meniň arzuwym hasyl bolup, onuň miwesinden süýjülik bilen dadyp ýörün.
— Teatra gadam basanyňyzdan sahnada ilkinji döreden keşbiňiz we onuň özüňizde galdyran täsiri hakynda gürrüň beräýseňiz?!
— Magtymguly adyndaky Milli sazly drama teatrynda ilkinji döreden keşbim «Hüýrlukga — Hemra» dessanynda baş keşpleriň biri bolan Has-Keniziň keşbi boldy. Bu keşbi maňa Türkmenistanyň halk artisti Ata Alowow ynandy. Menem halypamyň ynamyny ödejek bolup yhlas edip, Has-Keniziň keşbini tomaşaçylara ynandyryjy ýetirmegi başardym. Şondan soň teatryň režissýorlary keşp yzyna keşp ynanyp başladylar, olardan «Sawçy sallahlarda» Ýamanja ejäniň, «Bir ojakda iki dünýäde» Bike daýzanyň, «Baý gelinde» Selbijemal Gelenownanyň, «Nurana şekillerde» gumly gelin Arzuwjemalyň keşplerini ýatlamaga mynasyp hasaplaýaryn.
— «Körpe gelin» atly täze sahnalaşdyrylan spektaklda döreden keşbiňiz we şol keşbiň özüňizde galdyran täsiri barada aýdaýsaňyz...
— Biziň teatrymyzda doganlyk halklaryň sahna eserlerine hem yzygiderli ýüzlenilýär. Ine, geçen teatr möwsüminde özbek dramaturgy Nurullo Abbashanyň «Körpe gelin» atly spektaklyny sahnalaşdyrdyk. Maňa bu oýunda körpe gelniň gaýynenesi Karima apanyň keşbi ynanyldy.
Agzybirlik, birek-birege söýgi, hormat-sylag, maşgala binýadynyň berk tutulyp, onuň hiç haçan mizemezligini gazanmak baradaky pikirler bu oýnuň içinden eriş-argaç bolup gelýär. Karima apa maşgalada agzybirligi, tertip-düzgüni, edep-terbiýäni berk gorap saklamakda görelde bolup durýar. Bu enäniň keşbi maňa örän ýakyn, ol söýgüli keşplerimiň biri bolup ykbalymda orun aldy.
— Siz «Türkmenfilm» birleşiginde surata düşürilen «Ömür kerweni» atly köp bölümli filmiň baş gahrymany Kerweniň ejesiniň keşbini döretdiňiz...
— Türkmenistanyň at gazanan artisti Şyhmämmet Mollaýewiň surata düşüren «Ömür kerweni» atly köp bölümli filminde maňa Kerweniň ejesi Annatäç enäniň keşbini ynandylar. Perzendine diňe halallygy, päkligi ündeýän enäniň keşbini döretmegim meni tomaşaçylar köpçüligine has-da ýakynlaşdyrdy. Bu keşp durmuşdaky häsiýetime-de gabat gelýär diýip hasap edýärin. Häzirki güne çenli filmiň 20 bölümi «Miras» teleýaýlymy arkaly görkezilip, halk köpçüliginiň gyzgyn söýgüsine mynasyp boldy.
— Siziň maşgalaňyza «sungat maşgalasy» hem diýýärler.
— Ýanýoldaşym Tirkeş Kowusow Alp Arslan adyndaky Milli drama teatrynda artist hem-de «Türkmenfilm» birleşiginde kinorežissýor bolup zähmet çekýär. Uly oglum Didar Magtymguly adyndaky Milli sazly drama teatrynyň artisti. Gyzym Eneş artistçilik ugrundan ýokary bilim aldy. Körpe oglum Döwlet sporty saýlady. Gelnim öý hojalykçy, agtyklarym bar. Geçen 2018-nji ýylda Gahryman Arkadagymyz maňa-da Medeniýet şäherçesinden ähli amatlyklary bolan bäş otagly öý berdi. Munuň üçin Gahryman Arkadagymyza bütin maşgalamyzyň alkyşy çäksizdir.
— Aýsoltan, beren gyzykly gürrüňleriňiz üçin sag boluň!
Söhbetdeş bolan Akmyrat HOJABERDIÝEW,
Oguz han adyndaky «Türkmenfilm» birleşiginiň hünärmeni.
Mary welaýatyndaky känden senagat ähmiýetli gaz akymy alyndy
Berkarar döwletiň täze eýýamynyň Galkynyşy döwrüniň «Garaşsyz, baky Bitarap Türkmenistan — bedew batly at-myradyň mekany» diýen şygar astynda geçýän ýylynda türkmen halkynyň Milli Lideri Gahryman Arkadagymyz tarapyndan başy başlanan, häzirki döwürde bolsa hormatly Prezidentimiz Arkadagly Gahryman Serdarymyzyň baştutanlygynda üstünlikli durmuşa geçirilýän döwlet syýasatynyň netijesinde, Garaşsyz, baky Bitarap Türkmenistanyň ähli ugurlarynda, şol sanda ýangyç-energetika toplumynda taryhy özgertmeler amala aşyrylýar.
Türkmenistanyň nebitgaz toplumy Garaşsyzlygymyzyň 35 ýyllygyny zähmet ýeňişleri bilen garşy alýar
Mukaddes Garaşsyzlygymyzyň şanly 35 ýyllygyna hem-de «Garaşsyz, baky Bitarap Türkmenistan — bedew batly at-myradyň mekany» diýen şygar astynda geçýän ýylyň hormatyna Türkmenistanyň Döwlet medeniýet merkeziniň Mukamlar köşgünde ýokary guramaçylyk derejesinde geçirilen dabaraly mejlis medeniýet we sungat işgärlerini, jemgyýetçiligiň wekillerini bir ýere jemläp, ýurdumyzda täze ruhubelentlik we döredijilik badalgalaryny döretdi.
Türkmenistanyň energetika kuwwaty täze derejä çykýar
Türkmenistanyň ýangyç-energetika toplumy milli ykdysadyýetiň düzüminde möhüm orny eýeläp, ykdysady ösüşi üpjün etmek bilen çäklenmän, eýsem, döwletimiziň halkara giňişliginde eýeleýän ornuny pugtalandyrmagyň möhüm guraly bolup durýar. Häzirki döwürde pudagyň ösüşi uzak möhletli durnuklylygy, tehnologik döwrebaplygy we daşary ykdysady gatnaşyklaryň giňeldilmegini ugur edinýän yzygiderli we strategik häsiýete eýe bolýar.
Türkmenistan we Malaýziýa nebitgaz pudagynda strategik hyzmatdaşlygy berkidýärler
19-njy iýunda paýtagtymyzdaky Söwda-senagat edarasynda geçirilen «Türkmenistan — Malaýziýa: nebitgaz pudagynda özara bähbitli hyzmatdaşlyga 30 ýyl» atly halkara ylmy-amaly maslahat hem-de energetika pudagynda iki ýurduň netijeli gatnaşyklarynyň otuz ýyllygyna bagyşlanan sergi türkmen-malaý gatnaşyklarynyň ýokary derejesini hem-de nebitgaz pudagynda hyzmatdaşlygyň strategik häsiýetini dabaralandyrdy.
Owganystanda TOPH gaz geçirijisiniň strategik böleginiň gurluşygy dowam edýär
«Garaşsyz, baky Bitarap Türkmenistan — bedew batly at-myradyň mekany» diýen şygar astynda geçýän ýylda häzirki döwrüň iri halkara energetika taslamalarynyň biri — Türkmenistan — Owganystan — Pakistan —Hindistan (TOPH) gaz geçirijiniň gurluşygy dowam edýär.
