«Daşoguzşähergaz» gaz hojalyk edarasynda aýba-aý iş tabşyryklarynyň talabalaýyk ýerine ýetirilmeginde hem-de tebigy gazy ulanyjylaryň gaz enjamlaryndan ýerlikli peýdalanmagyny gazanmakda edaranyň içeri öý gaz enjamlary gullugynyň işçi-hünärmenleriniň mynasyp paýynyň bardygyny bellemek bolar.

Tejribeli hünärmen Merdan Gutlyýewiň ýolbaşçylygynda nusgalyk işleri alyp barýan bu gullugyň uly ussasy Sadylla Ýusupow, bejeriji slesarlar Baýram Babajanow, Döwran Allaberdiýew, Baýram Piriýew we Şöhrat Hojagylyjow dagynyň hyzmatyndan şäheriň ýaşaýjylary diýseň hoşal. Biz munuň şeýledigine Daşoguz şäheriniň «Nowruz» ýaşaýyş jaý toplumynda ýaşaýan Bäşim Mätiýew we welaýat merkeziniň Gurluşykçy köçesiniň ýaşaýjysy Täzegül Nepesowa dagy bilen gürrüňdeş bolanymyzda hem doly göz ýetirdik. Olar söhbetdeşligimiziň dowamynda edaranyň hünärmenleriniň şäheriň ilatynyň arasynda ýygy-ýygydan bolup, gaz enjamlaryndan hem-de tebigy gazdan peýdalanmagyň düzgünleri, ýangyn we tehniki kadalaryny gyşarnyksyz berjaý etmek barada alyp barýan wagyz-düşündiriş işleriniň möhüm ähmiýete eýedigini hoşallyk bilen gürrüň berdiler.

— Häzirki döwürde edaramyzyň gazçylary tarapyndan Daşoguz şäheriniň çäginde bar bolan dürli basyşly bitewi gaz ulgamlarynyň 550 kilometre golaý ýerine, gaz paýlaýjy we sazlaýjy enjamlarynyň bolsa 445 sanysyna gije-gündiziň dowamynda yzygiderli gözegçilik edilýär. Olardan daşary şäheriň edara-kärhanalarynyň hasabynda-da 110 sany gaz paýlaýjy we sazlaýjy enjamlar bolup, olar hem meýilnama esasynda gözegçilikden geçirilip durulýar. Ýokarda agzalyp geçilen gaz geçirijileriň 228 kilometre golaýy ýerasty, 320 kilometrden gowragy bolsa ýerüsti gaz ulgamlarydyr. Şol gaz geçirijileriň we gaz enjamlarynyň kadaly işlemegi welaýat merkeziniň 27800-e golaý hojalygynyň ilatynyň hem-de edara-kärhanalarynyň ýylyň islendik möwsüminde tebigy gaz bilen bökdençsiz üpjün bolmagyny şertlendirýär. Munda edaramyzyň daşary gaz geçirijilerine we gaz sazlaýjylara gözegçilik gullugynyň öz işleriniň ussady bolan işçi-hünärmenleriniň saldamly paýynyň bardygyny buýsanç bilen aýtsa bolar. Halypa gazçy Kadyrbergen Orunbaýew tarapyndan ýolbaşçylyk edilýän gullugyň gazçylary häzirki döwürde Daşoguz şäheriniň Görogly, Şagadam, Bitaraplyk köçeleriniň ugrunda hem-de «Nowruz» ýaşaýyş jaý toplumynda we «Gülüstan» şäherçesinde bar bolan ölçeginiň ululygy 57 millimetrden 114 millimetr aralygyndaky gaz geçirijileri we gaz paýlaýjy, sazlaýjy enjamlary düýpli gözden geçirmek, reňklemek işlerini guramaçylykly dowam edýärler — diýmek bilen, «Daşoguzşähergaz» gaz hojalyk edarasynyň baş inženeri Mekan Mämmedow öz gündelik alyp barýan wajyp işleri barada gürrüň berdi.

Edaranyň gazy ýerleşdiriş we hasaba alyş gullugynyň işgärleriniň şäheriň sarp edijilerine berilýän gymmatly «mawy ýangyjyň» hasabyny dürs ýöretmek we tebigy gazyň tygşytly hem-de netijeli ulanylmagyny gazanmak ugrunda durmuşa geçirýän işleri hem aýratyn bellärliklidir. Munuň şeýledigine biz gullugyň başlygy Baýmyrat Esenamanow bilen söhbetdeş bolanymyzda has aýdyň göz ýetirdik. Onuň gürrüňlerine görä, gullugyň Azat Gurbanbaýew, Roza Maşaripowa, Ogulbaýram Töräýewa we Sahy Şyhdurdyýew ýaly barlaýjy hünärmenleriniň birleşen tagallalary netijesinde şäheriň tebigy gazy ulanyjylary bilen aýba-aý hasaplaşyk işleri öz wagtynda amal edilip, «mawy ýangyjyň» ýerleşdirilişinde, tygşytly hem-de netijeli ulanyşynda ýokary netijelere eýe bolunýar. Munuň özi bolsa Berkarar döwletiň täze eýýamynyň Galkynyşy döwrüniň esasy talaplarynyň biridir.

Dädebaý NARTYÝEW,

Ussatnews.com.